VLU-Pietersburg Noord leer meer oor gesonde leefstyl
Elke jaar word daar ‘n tema toegeken aan die VLU-takke waarom hulle hul vergaderingbesprekings saam kan stel. Vanjaar is die tema ‘Seisoen van Vernuwing’ en om daarby aan te sluit het Aleshia Kellerman met die vroue gesels oor gesonde leefstylkeuses en holistiese ontwikkeling.
Dit het op 21 April tydens die klub se maandelikse vergadering by die Moth-saal plaasgevind.
Aleshia, ‘n voedselkundige, maak haar eie melk kefir en kombucha en het genoeg saamgebring sodat almal kon proe.
Aleshia raak die onderwerp van insulien en hoe om jou bloedsuikervlakke stabiel te hou, aan.
“Deur die regte kossoorte te eet kan jy jou verteringstelsel gesond en skoon hou.
“Bone is baie gesond en daar is heelwat kos in ons dieëte wat ons met bone kan vervang.”
‘n Paar van die tak se lede het vooraf sjokolade mousse en quiche gemaak vanaf Aleshia se resepte en dit tydens die vergadering voorgesit.
Ilana Pollard, voorsitter van die oggendtak, sê die praatjie was baie interessant.
“Ons het net weer besef hoe verkeerd ons eintlik eet en dat dit die rede is waarom soveel mense aan verskillende siektes ly. Die lede was vasgevang in Alesia se praatjie en het heelwat vrae aan haar gestel.”