Voortrekkers sluit kwartaal op ‘n soet manier af
Die vrolike stemme van die Doornkraal Voortrekkers het verlede Dinsdag oor die N.G. Kerk Noordgemeente se terrain weergalm.
Hulle het liedere soos Tan Hessie se wit perd, Bobbejaan klim die berg en Waar is my Dina gesing tydens hul afsluiting van die kwartaal se aktiwiteite en dit was duidelik dat die Vories uitgesien het na die vakansie wat na die Junie-eksamen begin. Voordat almal vir ‘n ruk paaie skei, het hulle eers met koekies en ander lekkers ‘n Voortrekkerwapen gemaak.
Saam met dié aktiwiteit het die Vories ook geleer wat die verskillende aspekte van die wapen beteken.
Die wapen bestaan uit die voorwiel van ‘n kakebeenwa, blou linte met die Voortrekkerleuse, en ‘n brandende fakkel. Die fakkel stel lig voor wat die Voortrekkers die regte pad in die donker en gevaarlike plekke uitwys.
Die Voortrekkers gebruik ook só die Bybel om hul rigting te bepaal. Hulle moet die lig wees wat vir ander die pad wys.
Die Voortrekkers se leuse is Hou koers en beteken ‘n mens moet nie op een plek besluitloos bly staan nie, maar eerder rigtingvas volgens vaste beginsels vorentoe beweeg. Die voorwiel van ‘n kakebeenwa bepaal die rigting waarin die wa getrek word. Net so moet die Voortrekkers opstaan en rigting gee, en hulle vriende op die regte pad help. Die 10 speke stel die 10 kodes van die Voortrekkers voor.
Nadat die penkoppe en drawwertjies hul wapens voltooi het, kon hulle dit eet saam met warmsjokolade of koffie wat deur die verkenners voorberei is.
Volgens kommandoleier Henk Lottering het die Voortrekkers nuwe maats gemaak en baie take verrig in die laaste kwartaal. “Ons het die kwartaal afgeskop met ‘n vrugtefees en het by die Pietersburg Konsentrasiekamp Kerkhof gaan kranse lê en die omgewing skoongemaak.”
Johmar Wolmerans, een van die Doornkraal Voortrekkers, het deelgeneem aan die gebiedsjeugraad keuringsdag en sy aansoek tot die gebiedsjeugraad 2022/23 was suksesvol.
Dit beteken dat hy as jeugleier sekere take het om te verrig soos om ‘n spanbounaweek te organiseer en gebiedsbestuurvergaderings by te woon.
“Dit is soos die leerderraad wat alle jeuglede in die noordelike provinsies (Limpopo, Gauteng, Noord-Wes en Mpumalanga) verteenwoordig.
Daar is agt gr. 11-verkenners wat jaarliks verkies word. Johmar is verkies as een van twee om die Berg en Bos Oord te verteenwoordig, wat die noordelike en westelike deel van Pretoria, Brits, Rustenburg en hele Limpopo behels. Ons is baie trots op hom en wens hom alle voorspoed toe,” sê Lottering.