Sekelbosfees 2022 groot sukses

Die Sekelbosfees het die afgelope naweek groot aftrek geniet met vermaak vir oud en jonk.

Terwyl die gaste tussen die verskeidenheid stalletjies deurgeloop het, kon die kinders op die springkastele baljaar. Daar was ‘n biertent met iets koel om te drink en kosstalletjies om van te kies en te keur. Daar was klere, juwele, velskoene, speelgoed en selfs die Ereveldwagters wat besoekers meer oor hulle dienste vertel het.

Kunstenaars soos Lu-Anel, Hennie en die Kitaarkêrels, Armand van der Merwe (die singende Cowboy), JP White en Almur het die gehoor opgewarm vir Adam Tas, Demi-Lee Moore, Elvis Blue en Bernice West.

“Ek het die fees baie geniet. Dit is ‘n lekker manier om die warmer weer te verwelkom, so met al die stalletjies, musiek en vriendelike mense. Ek sien uit na die volgende een, maar hoop om meer plaaslike talent op die verhoog te sien,” sê Sonja Ferreira, een van die besoekers.

Die Pixies-span is gereed met heerlike, yskoue drankies. Hier is Laurette Hattingh, Nina Kotze en Wian Hattingh.

Louis en Adèle Koekemoer het iets van alles waarvan kinders sal hou.

Dienkie Laas en Hennie die kuiken verkoop meel-en bosbroeke.

Hester en Anoeska Marais saam met Tsitsi Brooks verkoop juwele.

Amelia Grobbelaar het ‘n groot verskeidenheid vetplante te koop.