Dis Hunt Ex!
Soos die meeste van julle teen hierdie tyd al weet, is Aprilmaand skoumaand hier aan die Rand. Soos die geval is sedert 2011 word die jaarlikse Hunt-Ex-verbruikersuit-stalling weer by die Gallagher Convention Centre, in Midrand, Gauteng gehou. Hierdie jaar vind dit van 24 tot 27 April plaas. Dis ’n skou wat hoofsaaklik gemik is op jagters, sportskuts, wildplaaseienaars, wildboere, hengelaars en natuur- en buitelugentoesiaste.
Let wel dat die skou op Vrydag 24 April net oop is vir mense wat vooraf VIP-kaartjies op uitnodiging bekom het. ’n Beperkte hoeveelheid kaartjies word vir Vrydag 24 April beskikbaar gestel en verkoop en is eintlik net bedoel vir die uitstallers/handelaars en hul kliënte. Persone wat nie in besit is van VIP-kaartjies nie, sal beslis nie toegelaat word nie.
Omdat HuntEx veral op vuurwapens vir jag- en sportskietdoeleindes konsentreer is dit die grootste kleinkaliber-wapenskou in Afrika en lok dit mense van oral oor die land. Dis ook nie net plaaslike uitstallers wat die skou besoek nie. Hierdie jaar sal uitstallers van Europa, die Midde-Ooste en Noord-Amerika ook te siene wees. ’n Hele aantal Italiaanse wapenvervaardigers van die Val Trompia-vallei in die noorde van Italië het reeds verlede jaar hul ware kom vertoon. Hierdie jaar is daar nie minder nie as 346 uitstallers en die organiseerders glo dat die besoekergetalle wat verlede jaar 40 221 was, hierdie jaar oortref sal word.
Daar is vanjaar verskeie nuwe hoogtepunte op die skou, waarvan ons net ’n paar hier noem. Blaser kom stel ’n splinternuwe M98 Magnum-geweer bekend, natuurlik geskoei op die bekende en beroemde Model 98-aksie. Die geweer het ’n dubbel-vierkantbrug, ’n nuwe drieposisieveiligheidsknip, spesiale pakking ( bedding) van die aksie en nog ander unieke eienskappe. Dit beloof om ’n baie spesiale grootkalibergeweer te wees teen ’n baie aantreklike prys.
Formalito, die plaaslike agent van Sauer kom vertoon die nuwe Sauer Model 404 wat ’n hele paar innoverende eienskappe het. Een daarvan is dat die sneller baie maklik verstel kan word vir trekkrag en treklengte en ook vir die gemaklikste vingerposisie op die sneller. Lope kan ook in ’n japtrap geruil word. Die 404 haal uiters maklik en vinnig uitmekaar. Hierdie Sauer sal by ’n paar uitgesoekte handelaars besigtig kan word en bestellings daarvoor sal geplaas kan word. Na verwagting behoort die eerste Model 404-gewere so teen die middel van die jagseisoen beskikbaar te wees. Sauer 404’s word in verskeie kalibers van .243 Win tot .375 H&H gemaak.
Helle, die wêreldbekende Noorweegse mesvervaardiger kom stel hul Afrika-mes bekend. Suid-Afrikaners soos Johan Badenhorst van Voetspore- faam het aktief deelgeneem aan die ontwerp van die mes. Corrie Moolman, die plaaslike verspreider van Helle-messe het kiaathout van Noorweë af ingevoer wat vir die Afrika-mes se hewwe gebruik sal word. Lede van die Voetspore- span sal elke dag by die Helle-stalletjie wees om hul wedervaringe in Afrika
met mense te deel.
Die SA Butchery School gaan vanjaar vleisverwerkings-demon-strasies in Saal 3 aanbied (dit kos R20 per persoon) en daar word ook ’n doelgeboude verkoelingswa vir jagters by die skou bekendgestel. Dit is spesiaal deur twee Pretorianers ontwerp vir jagters om hul wildsvleis en -karkasse higiënies en goed verkoel te vervoer terug huis toe.
Biltongmakers kry ook die kans om hul slag te wys. Bobaas-biltongmakers kan hul resepte inskryf op HuntEx se webwerf, www.huntex. net en die biltongmaker wat as die wenner aangewys word, sal ’n Titan-geweer wen.
Hierdie jaar word Die Boma ook bekend gestel. Dit is ’n omheinde area oorkant Saal 3 wat voorsiening maak vir vermaak en gerief. Mense kan etes daar koop en lekker kuier en ontspan. Hannes Brummer, die gewilde akteur en komediant sal tydens HuntEx al die belangrike aankondigings vanuit Die Boma maak. Dis ook die enigste plek waar alkohol verkoop sal word, daar sal musiek en ook ’n groot TV-skerm wees. Die enigste ingang na Die Boma sal by Sharp Corner, die mesmakers se stalletjies wees en toegang kos R20 per persoon.
Op Saterdagaand 25 April om 19h30 tree die kitaargroep Riders of the Storm onder leiding van Mel Botes op in die Gallagher Auditorium. Kaartjies kan vooraf op die HuntEx-webwerf, www. huntex.net bespreek word en kos van R100 tot R200. ’n Beperkte aantal kaartjies van R250, wat toegang tot die skou ook insluit, is beskikbaar.
Behalwe vir die vele hande- laars en groothandelaars wat ’n wye reeks produkte gaan uitstal sal Action Ford van Krugersdorp ook op die skou wees. Mense wat Ranger-bakkies daar koop kan enigiets van R3 000 tot R20 000 wen met dié aankoop.
Dan is daar ook verskeie jagondernemers wat kom uitstal, hulle sal almal in Saal 4 geakkommodeer word om dit vir besoekers makliker te maak. Mense wat nog nie jagte bespreek het vir 2015 nie, kan gerus daar ’n draai kom gooi.
Safari & Outdoor, een van die ruimhartige borge van die skou, stel ’n Savage-geweer beskikbaar wat op elke skoudag gewen kan word en twee op die laaste dag. Lootjies vir die gewere is gratis, jou toegangskaartjie tot HuntEx dien ook as jou lotery-inskrywing. Deur bloot jou kaartjie in die spesiale houers te plaas wat by die inligtingstoonbanke geplaas is, staan jy ’n kans om ’n geweer te wen.
Toegang vir volwassenes is R100 en vir jongmense onder 21 is die prys R50. Kinders onder 10 word gratis toegelaat. Lede van die volgende jagverenigings betaal halfprys indien hulle hul lidmaat-skapkaartjies kan toon: SAJWV, CHASA, PHASA en NSA.
Kaartjies sal by die ingange beskikbaar wees, maar om lang toue te vermy, kan kaartjies vooraf aanlyn gekoop word by www. huntex.net/tickets en ook op HuntEx se Facebook-blad.
Parkering is beskikbaar by Gallagher en kos R20 per motor. Die Gautrain kan ook gebruik word om tot by Midrand te ry vanwaar HuntEx-bussies ’n gratis pendeldiens tussen die stasie en die Gallagher Convention Centre sal verskaf.
Sien julle daar!