VFG vir vinnige flatervrye skoonmaak
’n Sakpasstelletjie is net die ding vir wanneer jy jou geweer wil skoon hou tydens ’n jagvakansie, maar jy nie lang skoonmaakstokke wil saam karwei nie.
Ek is seker daar is derduisende skuts regoor ons land wat net soos ek wens hulle hoef hul gewere en pistole se lope nooit skoon te maak nie. Ongelukkig is loop skoonmaak net so deel van skiet soos die trompslag as jy die sneller trek.
Daar is baie gelowe en bygelowe wanneer dit kom by die skoonmaak van ’n vuurwapen se loop. Sommige mense glo dit is taboe om met enige koper- of ander tipe metaalborsel in ’n loop te karring. Ander glo dat jy glad nie enige skoonmaakmiddel wat ammoniak bevat naby ’n geweerloop mag bring nie. Sommiges maak net een maal ’n jaar skoon en ander na elke besoek aan die skietbaan of jagveld.
Hoe dit ook al sy, lope moet een of ander tyd skoongemaak word. Ek is een van daardies wat glo dat dit maar liewer gereeld gedoen moet word. Gelukkig is daar deesdae vele hulpmiddels wat die skoonmaakproses makliker maak en ook skoonmaakmiddels wat beter en gouer werk.
OULIKE STELLETJIE
Die Verenigte Filzfabriek AG (VFG) wat in Giengen, Duitsland gesetel is, voorsien oulike skoonmaakstelletjies en viltproppe wat loop skoonmaak baie maklik maak.
Vilt, wat van merinoskaapwol gemaak word, word vir vele gebruike aangewend, soos byvoorbeeld vir die hamers van ’n klavier – dis nou daardie platronde “koppe” wat teen die
snare slaan om die geluid voort te bring as jy die klawers druk.
Gelukkig werk vilt ook baie goed om geweerlope mee skoon te maak as jy ’n viltprop van die regte grootte gebruik. VFG maak twee tipes viltproppe vir daardie doel. Een tipe is ’n suiwer, wit prop wat aangewend kan word wanneer die wapen se loop nie baie vuil is nie. Die tweede tipe is een waarin fyn geelkopervylsels ( brass) gebed is en wat soos ’n koperborsel ’n skuuraksie kan veroorsaak om hardnekkige vuilis uit ’n loop te skrop.
Hierdie viltproppe word in 15 verskillende kaliber-groottes gemaak, van 4.5mm (.17”) tot 12-, 16- en 20-boor vir haelgewere.
Maar hoe werk dié viltproppe? Elkeen het ’n gaatjie deur sy middel en word op ’n spesiale koppelstuk geskroef en/of gepas, wat op sý beurt weer aan ’n skoonmaakstok geskroef kan word. Die viltprop word dan bloot met die skoonmaakstok deur die geweer se loop gestoot.
Ek het twee van die stokke van Parker Hale gebruik wat verskaf is deur Bushill Suid-Afrika, die agente vir Parker Hale en VFG-produkte. Parker Hale is ’n ou en welbekende naam in die skietwêreld en hul skoonmaakstokke is van die hoogste gehalte. Ek gebruik al jare lank twee Parker Hale-stokke en hulle lewer nog net sulke goeie diens soos toe hulle nuut was.
Let op dat die koppelstuk ’n skroefdraad het en ook ’n sluitmoertjie. Eerstens word ’n prop van jou keuse aan die koppelstuk geskroef en in plek gesluit met die sluitmoertjie (Foto 1). Met dit gedoen, sal jy sien dat daar nog ’n stuk van die koppelstuk se punt verby die sluitmoertjie steek. Vooraan die koppelstuk kan daar dus nóg ’n prop geplaas word.
Wanneer die skoonmaakstok deur die loop gestoot word en weer teruggetrek word, val hierdie voorste prop dus af en word al die vuilis nie weer deur die loop getrek nie. Die agterste prop bly aan die koppelstuk om die loop verder skoon te maak met die terugtrekslag. Indien jy verkies om nie ’n effens vuil prop weer deur die loop te trek nie, kan dit bloot afgeskroef »
» word, of jy kan eenvoudig net een prop op ’n slag aan die koppelstuk pas (maar moet dit nie inskroef nie). Draai eers die sluitmoertjie aan die koppelstuk sover as wat dit kan en plaas dan bloot die viltprop op die punt van die koppelstuk.
Die viltproppe kan met skoonmaakmiddel of olie natgemaak word om te help met die skoonmaakaksie. Let wel: Die proppe vervul die funksie van skoonmaaklappe maar dit bevat geen spesiale skoonmaakmiddels nie – jy moet die olie, koolstof- of koperverwyderaar aan die viltprop sit. Die “skuurprop” werk soos ’n koperborsel maar het ’n veel sagter werking – vir diegene wat glo dat koperborsels nadelig is vir ’n geweerloop.
Om lappies van die regte grootte te knip, kan nogal ’n sleurwerk wees en dis hier waar die viltproppe dinge baie makliker maak. Koop ’n pakkie of twee van die regte grootte proppe en siedaar, jy skroef of plaas dit net op die skoonmaakstok en laat waai.
VFG het egter verder gedink en ook ’n veld- of sakpasskoonmaakstelletjie uitgedink. Dit bestaan uit ’n klein ronde blikkie waarin ’n staalkabel-loopdeurtrekker gebêre word. Dié kabeltjie het klaar ’n integrale viltprop-houer of koppelstuk aan en kom ook met ’n verwyderbare, plat, aluminium deurtrekkerhandvatsel. Ek noem dit sommer ’n “grypgreep”. Dié greep is ’n sirkelvormige stukkie aluminium met ’n gleuf in gesny waarin die kabeltjie pas. Aan die een kant van die staalkabeltjie (terloops, dis met plastiek oorgetrek om te verhoed dat dit die geweerloop beskadig) is daar ’n metaalknoppie wat teen die grypgreep vassteek as die kabel in die gleuf geplaas word (sien foto). Jy sit dus ’n viltprop aan die prophouer, plaas die deurtrekker se punt in die geweer se kamer, stoot dit deur tot die kabel se punt by die tromp uitkom, plaas die grypgreep in posisie en trek die kabeltjie met die prop deur die loop – baie maklik en effektief.
Die kabeltjie/deurtrekker is in totaal 92.5cm lank en ek het ook ’n ander funksie daarvoor ontdek. Jy kan dit sommer ook as ’n meetkabel vir bokhorings gebruik. Weens die lengte van die kabeltjie sal jy dit net vir boksoorte met korter horings soos springbokke, ribbokke, bosbokke, rooibokke, blesbokke en njalas kan gebruik. Ek het iewers ’n ou tou-skuifstopper ontdek wat van ’n bosbaadjie kom. Die gat was groot genoeg om oor die metaalknoppie aan die punt van die kabeltjie te pas, en siedaar – ek het nou ’n VFGmeetkabel ook!
BAIE HANDIG
Hierdie sakpasstelletjie is baie handig vir wanneer jy op ’n jag is en dalk vinnig ’n geweer se loop wil skoonmaak. Dit neem baie min plek in beslag en is so lig, jy kan dit sommer die hele dag in jou hempsak dra.
Ek het die viltproppe en die skoonmaakstelletjie nou al by verskeie geleenthede gebruik en dit werk uitstekend. Vir my vervang dit nie heeltemal die lappies en koperborsel waaraan ek gewoond is nie, maar ek dink dis ideaal vir lope wat nie te vuil is nie, of as jy reis en nie lang, lomp skoonmaakstokke wil saamkarwei nie. Hierdie produkte van VFG is iets wat ek beslis ten sterkte aanbeveel. Dit is duurder as lappies maar vir die doel waarvoor dit ontwerp is, klop jy nie hierdie VFG-produkte nie.
Behalwe vir die viltproppe en loopdeurtrekkers, bemark VFG ook ’n pasta ( bore paste/compound) wat as loopskoonmaakmiddel gebruik kan word. Jy sit bloot ’n bietjie aan ’n viltprop (of ’n lappie) en stoot dit verskeie kere heen en weer deur die loop. Ek glo dit kan ook gebruik word om nuwe lope se binnekante mee te poleer. Ek het dit op my .30-06 gebruik en dit het baie goed gewerk. • Bushill Suid-Afrika is die alleen-agente vir VFG-skoonmaakprodukte, hulle voorsien ook Parker Hale-produkte en vele ander skietbybehore aan ’n wye reeks van vuurwapen- en buitelugwinkels regoor SuidAfrika. Nader jou gunstelinghandelaar en as hy nie die produkte aanhou nie, vra hom om dit van Bushill te bestel.