Waar het my jag begin?
Onder SA JAGTER/ HUNTER se duisende lesers is daar vele wat interessante jagstories kan vertel, pragtige trofeekamers het en die mooiste gewere besit. Ons het dit goedgedink om van tyd tot tyd van hierdie mense (en hul skietgoed) aan ons wye leserspubliek bekend te stel.
Andries de Klerk van Ficksburg is een so ’n man. Sy trofeekamer is indrukwekkend en hy het ’n hele instapkluis vol mooi gewere. Ons het een Sondag vir hom gaan kuier en ’n baie aangename dag in sy en sy vrou, Elsa, se geselskap deurgebring.
Hier is Andries se storie en ons laat hom dit self vertel: “Ek het grootgeword in Colesberg in die Karoo waar my pa ’n plaas gehad het en ons so af en toe springbok, ribbok en blesbok gejag het. Ek is egter in standerd ses Paarl Boys High toe, waar ek gematrikuleer het in 1966.
Na matriek is ek weer terug plaas toe en het daar vir vyf jaar saam met my pa geboer. Toe die Vanderkloofdam gebou is, het die regering egter die grond uitgekoop aangesien dit onder water sou kom. Ek moes toe kies wat ek in die toekoms wou doen en het besluit om medies te studeer.
So is ek toe Stellenbosch toe en het my mediese studies voltooi in 1977. Van daar af het ek my huisdokterjaar in Uitenhage gaan doen. Daarna het ek ’n
vennootskapsaanbod in Uitenhage aanvaar en het sewe jaar lank daar diens gedoen.
Dit is in Uitenhage waar die groot jaggogga my gebyt het, en vriend Arthur Rudman van Blaauwkrantz Safari’s het my gereeld genooi om saam met hom te gaan koedoes skiet. Ek het ook gereeld by Jannie van Lyl, ’n vriend van Jansenville gaan jag en so ook by my skoonpa in Pearston.
Met die groot onluste in 2005 in die Kaap, het ek besluit om na die platteland te verhuis, en so het ek in Ficksburg te lande gekom waar ek nog steeds in die praktyk is.
Tydens die jare in Ficksburg het ek en my seun, Andries jr. (toe nog baie jonk) gereeld gaan rooibokke skiet in Pongola en in Ellisras. Dit was alles biltongjagte. Mettertyd het ons oorgeskakel na trofeejag toe, veral nadat ek my eerste groot koedoebul by oom Audley Vermaak by Glenconner geskiet het. Van daardie koedoe het ek ’n trofee gemaak en daarna het ons op gereelde basis in die buurlande gaan skiet: Namibië (Dama- »
» raland, Khomas Hochland, Grootfontein, Gobabis, die duine tussen Twee Riviere en Karasburg), Mosambiek, Zambezidelta, Sabipark (langs Kruger Nasionale Park), Zimbabwe (Bubi-area, Doma, Gwhai-area).
Wat die geweergogga aanbetref, was my seun Andries die groot motivering. Ons het in 2015 Turkye toe gevlieg en ons eie Turkse okkerneuthout gaan uitsoek in ’n fabriek. Ons het die hout saamgebring as deel van ons bagasie. Die volgende persone het vir my verskeie gewere gebou en van nuwe kolwe voorsien: Steve Fourie, Sabie Arms, Gerrie Coetzee, Ralph Badenhorst, Danie Joubert en Faan de Vos.
Daar is altesaam 47 spesies in my trofeekamer; die trofees vermeerder nie meer so flink soos aan die begin nie, aangesien nog net die duurder spesies ontbreek.”