Nuut op HuntEx
Die pas afgelope HuntEx by die Gallagher Estate in Midrand het hierdie jaar, anders as in die verlede, oor vyf dae gestrek. Vir die uitstallers en diegene wat produkte daar ver- koop het, was dit ’n marathon in die kleine.
Oor die 38 000 mense het hierdie jaar die skou besoek, wat minder is as verlede jaar, maar volgens die organiseerders het die meeste uitstallers wat hulle geraadpleeg het, beter gedoen as in die verlede. SA JAGTER/ HUNTER het ook met ’n paar uitstallers gepraat en behalwe vir een booghandelaar, het ons respondente genoem dat hulle ietwat minder sake gedoen het as verlede jaar.
HuntEx was egter, soos in die verlede, ’n reusesukses en dis lekker om soveel handelaars/ uitstallers onder een dak te hê, want dit laat ’n mens toe om produkte en pryse met mekaar te vergelyk en daar jou keuse te maak sonder om van winkel tot winkel te pendel.
Soos te verwagte, was daar soos gewoonlik al die normale produkte, van gewere, pistole, semi-outomatiese gewere, herlaaiprodukte, klere, skietbybehore, optiese produkte, voertuie,
boë, jagondernemers, kuns- en beeldhouwerk, ensovoorts.
Wat hierdie jaar opgeval het, was die groter aantal beeldhouers wat hul produkte kom uitstal het. Hoe suksesvol hulle was, weet ek nie. Ek het wel een beeldhouwerkuitstaller op die derde dag hoor sê dat hy daaraan dink om op te pak, aangesien niks by sy stalletjie gebeur nie. Om eerlik te wees, dink ek nie daar is ’n groot mark vir beeldhoukuns nie... veral nie teen die prys wat vir sommige van die beelde gevra is nie.
Wat gewere betref, was daar al die gebruiklikes en ’n paar duur kunswerke, maar wat my opgeval het was die kortloop, kortaksie Howa 1 500’s in 6.5 Grendel wat Die Koöperasie en Savuti uitgestal het. Hierdie gewere verkoop vir goed onder die R10 000 en die 6.5 Grendel is die ideale kaliber vir mediumklas wild in bosveldtoestande en sommige sportskietdissiplines. Dis in staat om ’n 123grkoeël teen sowat 2 600vps te vuur. SA JAGTER/HUNTER behoort binnekort een van die gewere te toets.
Rigby se Highland Stalkergewere wat op Mauser-aksies gebou is, het my ook opgeval. Dis gebou op die klassieke Engelse styl en lekker lig – ideaal vir die stapjagter wat sy geweer meer dra as skiet. Die pryse, beginnende by sowat R130 000, is egter sodanig dat dit ’n mens sooibrand wil gee. Maar as ek ’n los geldjie gehad het, sou ek dit baie ernstig oorweeg het om een te koop.
Sauer se Model 100 (die L&O-groep is die agente) is nou uiteindelik hier beskikbaar. Dit is Sauer se intreevlakgeweer en die een wat ons op HuntEx afgeneem het, was voorsien van ’n gekleurde berkehoutkolf. Dié Sauers se pryse is heel billik (net so knap in die R20 000’s) en die gewere is lekker lig en hanteer goed.
L&O is ook die agente vir Sig Sauer en ek het vir die eerste keer na die nuwe Sig Sauerteleskope gekyk. Die Tango 4 in 6-24x50 wat teen sowat R16 500 behoort te verkoop lyk na ’n uiters goeie produk. Dit kom met ’n verligbare kruishaar in die eerste fokusarea ( first focal plane – FFP), taktiese stelknoppe en uiters goeie glas. Dis ’n teleskoop wat ons binnekort sal toets.
Ek het ook ’n interessante knaldemper van A-Tec, die Optima A-Lock onder oë gehad (L&O is ook die agente vir »
» A-Tecprodukte). Die nuwe model kan in drie dele uitmekaar geskroef word om aan te pas vir verskillende aanwendings. Hierdie knaldemper word nie soos die gewones op ’n loop geskroef nie. Dit word bloot met ’n bajonet-tipe, draai-aksie van sowat 60° aan die loop gepas. Die voorste twee dele kan afskroef om dit vir ander kalibers te gebruik of vir ’n meer kompakte knaldemper. Dis ’n unieke konsep en ons sal beslis in die toekoms hierdie knaldemper toets.
G&G Varminting se Eugene van Niekerk en sy vennote was een van die kleiner uitstallers wat interessante produkte aangebied het. Wat die oog dadelik gevang het, was die unieke geweerrusse wat op kwadfietse en bakkiedeure gemonteer kan word. Dit stel die skut in staat om met gemak vanaf hierdie voertuie wild uit te dun. Vir die plaasboer en mense wat gereeld wild moet uitdun, sal hierdie geweerrusse beslis ’n groot aanwins wees.
G&G Varminting bemark ook die Aim-grendelknoppe vir Remington-gewere. Hierdie grendelknoppe bestaan uit twee dele en word bloot bo-oor die normale grendelknop aangeskroef. Dit werk uitstekend – ek het so ’n grendelknop van G&G Varminting op my Remington en is uiters tevrede. Eugene-hulle bemark ook Aim se mono-pod agterste geweerrus, blitsbrekers en sal binnekort ook spesiale geweerkolwe beskikbaar hê. Dan verkoop hulle ook die baie akkurate JLKkoeëls (ons sal dit ook toets).
Wat boë betref, het ek twee interessante produkte raakgeloop. By Redge Grant se Archer’s Edge het ek die Benjamin Airbow van Crosman bekyk. Hierdie uhmm... “boog” skiet wel pyle maar werk eintlik soos ’n PCP-windbuks. Dit lyk kompleet soos die sogenaamde bullpup-gewere en gebruik saamgeperste lug om ’n 375grvollengte pyl teen 450vps te lanseer. Die bekende Amerikaanse jagter Jim Shockey het ’n groot bisonbul daarmee doodgeskiet. Die lugsilinder stel jou in staat om 8 skote te skiet (teen 450vps) voordat dit weer hervul moet word. En ja, dit klap soos ’n PCP-windbuks as jy die sneller trek. Diegene wat dus met pyle wil jag, maar verkies dat hul wapen steeds moet “bang” »
» maak, sal hierdie kompakte pylgeweer baie aantreklik vind. Hierdie pylgewere verkoop teen sowat R22 000.
By Magnum Archery waar Seppie Cilliers die kitaar slaan, het ek na die nuwe Ravin-kruisboog gekyk. Soos julle kan sien, is hierdie een uiters kompak, maar ten spyte daarvan lanseer dit ’n 400gr-pyl teen 390vps. Twee modelle is beskikbaar en een kan selfs 400gr-pyle teen 425vps lanseer.
Hierdie kruisboog het unieke veiligheidsmeganismes wat verhoed dat dit skiet tensy die pyl presies reg in posisie geplaas is. Om dié kruisboog te span is ook baie maklik en word met behulp van ’n verwyderbare slinger gedoen. Wanneer die pyl in die snaar geplaas is hang dit ook byna heeltemal vry, wat wrywing verminder en so verseker dat die pyl die kruisboog teen maksimum snelheid verlaat.
Raymond Hoffman van die Cradle of Man-taksidermie naby Tarlton het unieke skietstokke uitgestal wat my dadelik opgeval het. Dis gemaak van koolstofvesel, is uiters sterk en baie lig. Dit word deur middel van ’n klein koppelstuk aan die geweer geheg. Die skietstok self het ’n gemagnetiseerde knop wat in die koppelstuk pas, so om dit te verwyder trek jy bloot ferm aan die skietstok en siedaar, dit kom vry! Vir die stapjagter is hierdie skietstokke ideaal. Ek het dadelik vir my sulke skietstokke gekry en dit al op ’n jag getoets direk na HuntEx. Ons sal daaroor berig in die Augustus-uitgawe.
Inyathi Sporting Supplies wat ’n groot verskeidenheid produkte invoer, onder meer Nosler-en Hornady-produkte het ’n lekker ligte skietstoel uitgestal wat byval behoort te vind by voorsitskieters wat gereeld springbokke en ander wild in die Karoo voorsit.
Ons motorborg, die Westvaalmotorgroep het ook ’n paar baie netjiese Isuzu-bakkies uitgestal. Ek het ’n hele aantal manne sien watertand kyk na die mooi rooi “gevaarte” waarvan die foto hier verskyn.
Vasbyt tot volgende jaar, ons sien julle weer by die Gallagher Estate.