CrossAfrica Camo
Dié nuweling beïndruk met sy goeie kwaliteit, lekker-dra jagbroek.
Cross Africa Camo is ’n relatiewe nuwe naam in die kamoefleerklerebedryf en dis ’n maatskappy waarvan die produkte plaaslik vervaardig word – in Hammanskraal, noord van Pretoria. ’n Verskeidenheid produkte word aangebied, van hemde, langbroeke, langmou-pluisstoftoppe ( sweaters), dik baadjies, kinderklere tot boshoede en pette.
Ons het ’n hemp, broek en ligte pluisstoftop van naderby bekyk. Cross Africa Camo se kamoefleerpatroon simuleer die winterdrag van bosveldbome en die patroon is op kakiekleurige materiaal gedruk. Ek sal later uitwei oor die geskiktheid van die kleur en kamoefleerpatroon.
Die kortmouhemp (van katoen) wat ons gedra het, het borssakke wat met knope vasmaak en daar is ’n Cross Africa Camo-embleem bo die linkersak. Dis ’n lekker koel hemp wat gemaklik dra. Die kakiekleurige agtergrond is ligter as dié van die broek.
Soos gebruiklik met die meeste jagklere is die broek van die gevegstipe ( combat pants) met heupsakke en sakke op die bobene. Die sakke op die bobene het flappe wat met knope vasmaak sodat items wat jy daarin wil bêre nie kan uitval nie. Soos alle tipe gevegsbroeke het dit lekker breë lusse aan die lyfbandgedeelte sodat jy ’n breë belt/gordel kan dra. Die broek maak toe met behulp van ’n ritssluiter en ’n knoop. Dan het die broek ook ingeboude kamaste ( putties of gators) en ’n rek wat onderom die voet gaan om die kamaste in plek te hou (meer hieroor later).
Ek was regtig beïndruk met die broek. Dis van baie sterk materiaal gemaak, het my perfek gepas en dra uiters gemaklik. Hierdie is beslis ’n broek wat jy met groot gemak die hele dag lank sal kan dra.
Daar is ’n hele paar vervaardigers/bemarkers wat ingeboude kamaste/ putties aan hulle langbroeke laat aanbring, maar volgens my is dit ’n foefie wat nie werk nie. Ek het in die verlede al heelparty sulke broeke getoets, maar onmiddellik die ingeboude putties verwyder. My hoofpunt van kritiek is dat dit nie in enkelhoogteskoene/stewels pas nie en ek hou nie van die rek om my voet nie. By die meeste van die broeke wat sulke ingeboude putties gehad het, was die totale pyp dan te lank en het die rek wat om jou voet moet gaan, heeltemal pap gehang – dis ook die geval met die Cross Camo-broek. Daar is seker mense wat van hierdie ontwerp hou, maar ek is nie een van hulle nie. Ek verkies om los putties te dra.
Hoe dit ook al sy, die Cross Africa Camo-broek is een wat ek beslis aanbeveel.
Die langmou-pluisstoftop is ideaal vir koel weer wanneer jy nie ’n dik baadjie wil gebruik nie. Ek sou dink dat dit ook ideaal is om oor ’n T-hemp aan te trek terwyl jy jag. Hierdie top het geen sakke nie, maar ’n ritssluiter by die kraag.
Na my mening is die kleure wat Cross Africa Camo in hul kamoefleerpatroon gebruik ’n bietjie aan die ligte kant, wat die aanwending daarvan beperk tot sekere tipes terreine. In normale bosveld vertoon hierdie kleure effens te lig na my sin. Dit sou meer geskik wees vir grasveld en terreine waar daar ’n amper totale afwesigheid van groen is. Kyk na die foto’s en julle sal sien wat ek bedoel. * Vir meer inligting oor Cross Africa Camo se produkte, besoek gerus hul webblad by www.crosscamo.co.za of e-pos Tienus by Tienus@crosscamo. co.za