Hell’s Canyon Browning
As jy nie hou van koud kry in die jagveld nie, het Browning nét die klere vir jou.
Baie mense dink seker dadelik aan gewere en haelgewere as hulle die naam Browning hoor. Dié Amerikaanse maatskappy bemark egter ook baie ander skiet- en jagbybehore waaronder verskeie klerereekse.
Ons het onlangs Browning se Hell’s Canyon Ultra-Lite-baadjie en -broek getoets. Hierdie klere word plaaslik deur Safari Outdoor bemark en verkoop.
Amerikaanse winters is baie kouer as ons s’n en die UltraLite-reeks is bedoel vir koel Amerikaanse weer of dit kan in kombinasie met ander warm klere gedra word. In Suid-Afrika sal ons dit sommer in die middel van die winter kan dra. Die eienskap van dié klere wat jou dadelik opval, is dat dit winddig en waterbestand is. Let wel, nie waterdig nie, slegs waterbestand. Dit beteken die klere sal jou droog hou in ligte motreën of tydens een van daardie ysreënbuie waarvoor die Karoo en dele van die Wes-Kaap so bekend is. Ek is seker ’n goeie klomp van ons lesers het al so iets beleef tydens ’n springbokvoorsitskiet.
Behalwe dat die Hell’s Canyon-klere jou teen wind en reën beskerm, het dit ook ’n pluisstofvoering (fleece) aan die binnekant wat verseker dat dit selfs ’n taamlike geniepsige byt van die winterkoue in toom sal hou. Die klere het ook verskeie sakke wat ek nou-nou sal bespreek.
Die kamoefleerpatroon is die sogenaamde bruin Mossy Oak en werk uitstekend vir bykans alle Suid-Afrikaanse jagterreine. Die klere het ook effekleurige bruin insetsels (sien foto). Wat die broek uniek maak, is die pype wat tot byna by knielengte kan ooprits. Dit help met die aanof uittrek van groot stewels en ook as jy sou besluit om ’n stel Hell’s Canyon-klere te koop om bo-oor ander warm klere te dra.
Die baadjie het ’n enkele klein binnesakkie wat toerits en bedoel is vir jou jaglisensie en jagtoestemmingsbrief, iets wat ons ook in Suid-Afrika veronderstel is om by ons te dra. Verder het die baadjie twee ruim kantsakke aan die buitekant wat kan toerits. Reg agter die kraag is ’n rits wat ek gedink het aangebring is vir ventilasie, maar dis eintlik ’n opening waardeur jou veiligheidsharnas se hegpunt gaan as jy op ’n platform (tree stand) diere voorsit in ’n boom. Jy kan dus dié baadjie oor jou veiligheidsharnas dra – dis nogal handig vir boogjagters wat gereeld diere in bome voorsit. Vir Suid-Afrikaanse geweerjagters is hierdie “nutsopening” natuurlik oorbodig.
Die broek het ’n rubbervoering aan die binnekant van die lyfbandgedeelte wat verhoed dat jou hemp of T-hemp uit jou broek trek terwyl jy beweeg. Verder het dit die normale heupsakke aan elke kant en twee bobeensakke aan elke bobeen. Laasgenoemde maak toe met behulp van ritssluiters. Daar is ook ’n gatsak aan die regterkant wat kan toerits. Soos julle op die foto’s kan sien, is daar bruin insetsels in die kniegedeelte wat glo aangebring is vir groter gemak en beweeglikheid. Browning noem ook dat die klere toegerus is met ADDvanced Scent Control wat diere verhinder om jou maklik te ruik. Wel, miskien werk dit met Amerikaanse bokke, maar my bevinding is dat dit nie met ons bokspesies werk nie. Ek het hierdie klere in die Oos-Kaap op ’n jag getoets, maar ek dink ons bokke se reuksintuig is te ADDvanced vir dié Scent Control.
Nadat ek hierdie klere in die jagveld getoets het, kan ek dit egter met groot vrymoedigheid