ZEISS VICTORY FR
Die mensdom se kennis en vermoëns brei by die dag al hoe meer uit en dis net natuurlik dat moderne tegnologie ook sy weg tot in die jagveld gevind het.
Daar bestaan al ’n hele rits produkte wat dit vir die jagter of skyfskietskut makliker maak om die koeël by die teiken of bok uit te kry. Afstandmeters is een so ’n produk. Daar is ’n swetterjoel verskillendes, en afstandmeters wat in verkykers ingebou is, neem ook toe. Die groot name in die optiese wêreld verskaf byna almal verkykers met ingeboude afstandmeters en Zeiss is geen uitsondering nie.
Hierdie Duitse maatskappy het egter een stappie verder gegaan en hul nuutste verkykerafstandmeter, die Victory R F, kan deur middel van Bluetooth met jou selfoon gesels om ballistiese data af te laai wat jy in die jagveld nodig mag hê.
Dit werk so: Jy laai Zeiss se Hunting App op jou foon af. Daarin is verskillende kalibers se koeëltrajekte gestoor. Jy kies dié wat die naaste me tjou geweer/ kaliber kombinasies’ n korrespondeer en deur middel van die Bluetooth-verbinding word dit na die verkyker-afstandmeter r toe oorgedra. Jy kan ook jou u geweer/kaliber se persoonlike ke data op die app aflaai en dit dan an na die verkyker oordra. Die verkyker-afstandmeter kan tot nege verskillende ballistiese trajekte stoor. As jy eers jou foon gebruik het om die data na die verkyker oor te dra, het jy nie weer jou foon nodig nie, dit kan by die huis gelos word. Dis net as jy nuwe data op die verkyker wil oordra dat die foon weer nadergesleep moet word.
Die verkyker gee dus nie net
die afstand na die bok toe nie, maar laat jou ook weet hoeveel klieks jy moet op stel of hoeveel die koeël op daardie afstand sal val. Dan kan jy die nodige verstellings maak om ’n trefskoot te skiet.
Zeiss se nuutste verkyker-afstandmeters is beskikbaar in 8x42-,10x42-, 8x54- en 10x54vergroting. Wat opmerklik is, is dat hierdie verkykers baie kompak is – anders as met sommige ander verkyker-afstandmeters is daar geen ekstra bulte wat uitstaan en verklap dat dit ’n verkyker-afstandmeter is nie. Die Zeiss Victory lyk bloot soos ’n gewone verkyker. Wat ’n mens met hierdie instrumente moet onthou, is dat almal (ongeag die fabrikaat) eerstens ’n verkyker is waarby ’n afstandmeter bygevoeg is. Moet dus nie onrealistiese verwagtinge koester van enige van die verkykerafstandmeters nie.
DIE TOETS
Ek het my .270 Win se data na die verkyker oorgedra en dit in die jagveld en op die skietbaan gaan toets. Nodeloos om te sê dit het uitstekend gewerk. Ons kon nie wild op langafstand skiet nie, maar op die afstande wat ons wel drie bokke geskiet het, het die Zeiss die korrekte inligting oorgedra. Ons kon wel die vermoëns van die Victory op die skietbaan toets en het dit gebruik om tot op 300m te skiet.
Volgens die vervaardiger kan die Victory afstand meet tot op 2 300m, maar ek kon nie daarin slaag om dit reg te kry nie. Die lig was baie dynserig toe ons die Zeiss in die veld gaan toets het en ons kon nie ’n ordentlike rus vir die verkyker kry nie. Om dit in die hand vas te hou en dan op lang afstande te meet, werk nie so goed nie, want jy bewe eenvoudig te veel. Ek kon wel voorwerpe tot net oor die 1 000m met gemak meet. Iets waaraan ek gewoond moes raak, is die posisie van die knoppie om die laser te aktiveer – dis geleë op die regterbuis net voor die brug. Aan die begin het ek dit verskeie kere mis gedruk en soms te hard (wat my herinner het aan die pluk of flinch van ’n geweersneller). Na ’n dag of wat se gebruik het ek egter aangepas by die knoppie se ongewone posisie.
Wat natuurlik dadelik opval met die Zeiss Victory is die ongelooflike helder beeld wat dié verkyker verskaf. Die kwaliteit van die lense is net eenvoudig iets wat gesien moet word om te waardeer. Geen wonder Zeiss word as ’n wêreldleier beskou nie. Ek het ook gevind dat die laser blitsvinnig reageer wanneer jy afstand meet. Ek het die Zeiss met twee ander hoëkwaliteit-afstandmeters vergelyk en die akkuraatheid van die Duitse model was elke keer 100%. Die rooi LED-tipe sirkel wat as mikmerk of visier dien is ook maklik waarneembaar, selfs in helder sonlig.
Nadat ek die Zeiss Victory vir ’n maand lank gebruik het, kan ek net positiewe dinge oor dié stukkie tegnologie sê. Die enigste ding wat aan die begin gepla het, soos reeds genoem, was die posisie van die knoppie wat die laser aktiveer.
Teen R55 000 is dit nie ’n goedkoop instrument nie, maar mense wat nie omgee om daardie geld uit te haal nie, sal beslis nie spyt wees nie. Hierdie tipe verkykers is beslis die moeite werd vir professionele jagters of diegene wat baie gereeld jag en nie vir alle inligting van hul gids of professionele jagter afhanklik wil wees nie.
Nie alle handelaars is bereid om sulke duur produkte in voorraad te hou nie, maar nader gerus jou gunsteling-handelaar indien jy belangstel. * Die Zeiss Victory RF is beskikbaar in Suid-Afrika en kan deur jou handelaar van die Zeissagent bestel word. Vir meer inligting besoek www.zeiss.co.za