DOOR PRO II- EN MAXBOX IIGEWEERRUSSE
Tydens 2018 se HuntExskou het ek hierdie handige geweerrusse raakgeloop by Eugene van Niekerk van G&G Varminting se stalletjie. Eugene is een van die land se mees gesoute jakkalsjagters. Sy besigheid verkoop talle skiet- en jagbenodigdhede.
Die Door Pro- en MaXboxrusse word van ’n duursame, liggewig-spons gemaak wat toegerus is met neodimium-magnete. Die Door Pro II is ’n uvormige stuk spons met ’n plat bokant waarop ’n metaalplaatjie gemonteer is. Om te gebruik, pas jy bloot die bene van die u-rus oor die voertuig se deur. Saam met die Door Pro word ’n v-vormige rus van dieselfde tipe spons voorsien wat ook met magnete toegerus is. Dié rus klou dus lekker stewig op die Door Pro vas (sien foto) en kan dus baie handig gebruik word vir skiet uit ’n voertuig.
Dan is daar die MaXbox II, wat ook van dieselfde spesiale soort spons gemaak is. Dit laat ’n mens nogal dink aan ’n x-bag. Die insnydings of u-vormige gleuwe in die MaXbox knyp die geweer lekker styf vas en stel jou in staat om vanaf twee verskillende hoogtes te skiet. Hierdie skietrus is ideaal vir wanneer jy jou geweer wil inskiet vanaf ’n skiettafel, oor ’n voertuig se enjinkap of kajuit (dit is ook toegerus met magnete) of as jy plat op die grond lê.
Die voordeel van hierdie sponsrusse is dat hulle veerlig is en maklik oral saamgekarwei kan word. Die MaXbox II het selfs ’n drabandjie wat aan die rus gekoppel kan word.
Hierdie geweerrusse is nóg ’n voorbeeld van hoe mense goeie, praktiese oplossings uitdink vir beter skietresultate. Beide die MaXbox II en Door Pro II werk uitstekend en derhalwe beveel SA JAGTER/HUNTER ook hierdie produkte met groot vrymoedigheid aan. Die kleinhandelprys vir die Door Pro II is R590 en die MaX-box II kos R540. * Om hierdie produkte te bestel, kontak Eugene van Niekerk by geno@ggvarminting.co.za