SNOTSIEKTE: WILDBOERE MOET OPDOK
In ’n onlangse hofuitspraak is wildboere gedwing om ’n beesboer te vergoed vir die verlies van 104 beeste as gevolg van snotskiete wat deur hul blouwildebeeste aan die beesboer se kuddes oorgedra is.
Die eienaar van Kwantum Simmentalers, Piet Wolmarans, boer reeds 25 jaar lank op sy plaas tussen Rustenburg en Swartruggens en hy is ’n bekende teler van dié beeste.
Meneer Wolmarans het nooit aan die moontlikheid van snotsiekte gedink nie omdat blouwildebeeste, wat die draers van hierdie siekte is, nooit in die omgewing voorgekom het nie. Piet se bure is wildboere wat blouwildebeeste op hul eiendomme gevestig het en dis vanaf hierdie eiendomme wat die snotsiekte deur sy Simmentalers opgedoen is. Toe onderhandelings met die bure misluk, het hy ’n siviele eis teen hulle ingestel waarna die hof in sy guns beslis het. Ingevolge artikel 11 (1) van die Wet op Dieresiektes moet boere alle moontlike stappe doen om die verspreiding van siektes te voorkom.
Daar is ooreengekom op ’n skikkingsbedrag vir die verlies van Wolmarans se beeste en die bure het opdrag gekry om die blouwildebeeste te verwyder van die plase wat aan meneer Wolmarans se stoetplaas grens.
Hierdie hofuitspraak is ’n duidelike waarskuwing aan wildboere wat blouwildebeeste in sekere gebiede wil vestig dat hulle verantwoordelik gehou kan word vir hul bure se veeverliese weens snotsiekte. Bron: Jasper Raats, Landbouweekblad.