SA JAGTERS MAG VARKPERMITTE UITREIK

SA Jagters het na ’n lang proses van onderhandeling met die Departement van Landbou, Bosbou en Visserye se Direktoraat Dieregesondheid daarin geslaag om erken te word as ’n bedryf s organisasie wat sy lede kan magtig om permitte uit te reik vir die vervoer van verwerkte wildevark karkasse en/ of-vleis. Hierdie vergunning is toegestaan aan SA Jagters deur middel van ’n magtiging uitgereik deur die Direktoraat in terme van Regulasie 20 van die Wet op Dieresiektes No 35 van 1984.

AGTERGROND OOR AFRIKA-VARKPES

Beheer oor die vervoer van vleis van wildevarke (veral vlakvarke) is reeds in 1935 ingestel in ’n poging om die verspreiding van Afrika-varkpes te beperk. Dis ’n hoogs aansteeklike en dodelike virussiekte wat veroorsaak word deur ’n virus wat tussen tampanbosluise en vlakvarke sirkuleer. Vlakvarke is draers van die virus en hoewel hulle nie deur die siekte aangetas word nie, is dit dodelik vir mak varke (varkboerderye). Dit is onseker of bosvarke en gewone wildevarke (mak varke wat wild geraak het, ook bekend as feral pigs) en selfs moontlik Europese bosvarke wat uit aanhouding ontsnap het, ook dalk draers van die virus mag wees.

Die beperking op die vervoer van vleis van wildevarke is in 1935 ingestel en was toe geldig vir bykans die hele Limpopo en groot aangrensende dele van Mpumalanga, die Noordwesprovinsie en die noordelike deel van KwaZulu-Natal. Hierdie gebied was destyds die natuurlike verspreidingsgebied van vlakvarke.

Met die huidige beperking op die vervoer van wildevarkvleis mag die verwerkte karkasse en/of vleis van vlakvarke en bosvarke slegs met ’n veterinêre permit van enige eiendom of plaas in RSA verwyder word. Verder magtig die permit slegs die vervoer van die karkas mits die vel, pote, kop, binnegoed en alle limfknope vooraf van die karkas en/of uit die vleis verwyder is.

Dit is redelik algemeen bekend dat die verspreidingsgebied van vlakvarke intussen geweldig uitgebrei het. Hulle is nou volop in die Oos-Kaap, Noordwes-provinsie, die Vrystaat en

die Karoo. Hiermee het die risiko dat Afrika-varkpes kan versprei, aansienlik vergroot en het daarom die noodsaaklike uitbreiding van die beperkings op die vervoer van wildevarkvleis meegebring.

Tot nou kon die permitte vir die vervoer van wildevarkvleis aan jagters slegs uitgereik word deur staatsveeartse en deur geregistreerde lede van WRSA wat as bedryf s organisasie gemagtig is om die permitte uit te reik in ooreenkoms met die Direktoraat Dieregesondheid.

DIREKTORAAT DIEREGESONDHEID SE VEREISTES

Die ooreenkoms wat SA Jagters nou bereik het met die Direktoraat Dieregesondheid magtig ons (soos reeds genoem) om as erkende bedryf s organisasie ook hierdie permitte beskikbaar te stel aan ons lede. Die vereistes wat gestel word om hierdie permitte te kan uitreik is soos volg: 1. Jy moet ’n opbetaalde lid wees van SA Jagters. 2. Jy moet die eienaar of bestuurder wees van ’n plaas of plase waarop jy varke wil laat jag. 3. Jy moet die plaas of plase registreer as eiendomme waar varke gejag sal word en waarvoor vleis vervoerpermitte uitgereik sal word wat onderhewig is aan die vereistes van die Direktoraat Dieregesondheid. 4. Om die permitte elektronies te kan uitreik moet jy toegang hê tot die internet en SA Jagters se lede- administrasie stelsel en jy moet beskik oor ’n rekenaar en drukker. 5. Jy moet die volgende vereistes wat gestel is deur die Direktoraat Dieregesondheid skriftelik aanvaar:

Volgens Regulasie 20, uitgevaardig ingevolge die Wet op Dieresiektes, mag geen vleis van wildevarke sonder die dekking van’ n staat s veearts permit in die provinsies Limpopo, Gauteng, Mpumalanga, Noordwes en KwaZulu-Natal vervoer word nie.

Regulasie 20 (a) (ix) lui: Enige vlakvark, bosvark of wildevark se karkas, vleis vel, trofee of enige ander produk van vlakvark, bosvark of wildevark oorsprong ( mag) na, oor of vanaf grond in die provinsies Limpopo, Gauteng, Mpumalanga, Noordwes of KZN verwyder (word) of beweeg nie. (Woorde tussen hakies duidelikheidshalwe ingevoeg deur SA Jagters.)

Die spesifieke vereistes, gestel deur die Direktoraat Dieregesondheid waaraan voldoen moet word deur elke persoon wat die permit uitreik en beide deur hom/haarself en die vervoerder van die varkvleis aanvaar moet word, is soos volg:

I have familiarised myself with the Animal Diseases Act (No 35 of 1984) and its regulations; I am aware that wild pigs (warthogs and bush pigs) and any ticks on the wild pigs carry a risk of transmitting African swine fever; I will only issue permits for processed meat products and carcasses without the head, legs, skin, viscera and lymph nodes; I will only issue one permit per single wild pig carcass without the head, legs, skin, viscera and lymph nodes; I will only issue one permit per wild pig carcass for household use (not commercial or trophy use) up to a maximum of three permits per transporter per week; I will only issue permits for wild pigs hunted on my premises; Should any signs of animal disease be noted on my premises I will contact the State Veterinarian of my area; I undertake to keep a signed hard copy of each permit issued for a period of 5 years; I agree to accommodate regular audits by SA Hunters on permits I have issued; I undertake to inform SA Hunters should there be a change to any of the details listed above (this includes any changes to ownership or management of the registered farm); I acknowledge that should I not comply with the above, my authorisation will be retracted.

ELEKTRONIESE UITREIK VAN PERMITTE

SA Jagters het die besluit geneem om die uitreiking van hierdie permitte reg van die be- gin af te vereenvoudig en slegs elektronies uit te reik en dan sonder enige koste aan die lid of sy jagter. Die rede hiervoor is doodgewoon om eerstens koste te bespaar vir die lid wat sy plaas wil registreer en die permitte wil uitreik, en tweedens om die verslagdoening oor die permitte uitgereik aan die Direktoraat Dieregesondheid, te vereenvoudig.

Die gewone gebruik was om boeke met permitte te laat druk en teen die koste daarvan aan lede te verskaf. SA Jagters se elektroniese uitreiking bring mee dat geen drukwerk vooraf gedoen hoef te word nie en die administrasie om die permitboeke na lede te versprei, word ook in geheel vermy.

Daar moet as een van die vereistes van die Direktoraat Dieregesondheid maandeliks verslag gedoen word oor alle permitte wat uitgereik is. Met die elektroniese uitreiking van hierdie permitte is die data outomaties reeds vervat in SA Jagters se stelsel en is daar bykans geen administratiewe werk nodig om die verslag aan Direktoraat Dieregesondheid te verskaf nie. Die data word doodgewoon vervat in ’n enkele lêer en per e-pos aangestuur na die verantwoordelike persone by die Departement.

REGISTRASIE VAN PLASE

Enige lid van SA Jagters wat ’n grondeienaar is en wat hierdie permitte wil uitreik, moet eerstens sy plaas registreer. Hierdie aansoek om registrasie word elektronies gedoen via die lid se persoonlike profiel in SA Jagters se lede-administrasie stelsel. Die aansoek moet voltooi word en uitgedruk en geteken word en dan geskandeer en teruggestuur word na SA Jagters of per telefaks na SA Jagters gestuur word. Hierdie aansoek word goedgekeur en ’n kopie daarvan aangestuur na die Direktoraat Dieregesondheid vir hulle rekords. U as lid sal dan in kennis gestel word dat u plaas geregistreer is en dat u die permitte kan begin uitreik. Uself en SA Jagters moet ’n harde kopie behou van hierdie skriftelike aansoek wat u indien.

UITREIK VAN PERMITTE

Sodra die lid in kennis gestel is dat die plaas geregistreer is, kan hy dan die permitte begin uitreik. Dit word ook gedoen op die lede-administrasie stelsel van die SA Jagters vereniginge n dit is vir hierdie uitreik van permitte wat lede toegang moet hê tot ’n rekenaar, drukker en toegang tot die internet.

Jy sal op jou ledeprofiel op die stelsel ingaan, die korrekte inligting verskaf en dan twee kopieë van die permit uitdruk. Beide kopieë word onderteken deur jouself en die vervoerder van die vleis. Jy verskaf een kopie aan die vervoerder van die vleis en een kopie moet veilig bewaar word vir ’n termyn van minstens vyf jaar.

’n Afsonderlike skrywe is deur SA Jagters aan sy lede gerig om die proses om die plaas te registreer en die permitte uit te reik, in meer detail te beskryf.

Indien enige lid sou belangstel om hierdie gratis fasiliteit te gebruik, kan hy/sy asseblief vir Boetie Kirchner skakel by 012808-9310 of ’n e-pos stuur na BoetieK@sahunt.co.za

NAVORSING EN DANKBETUIGING

SA Jagters het onderneem om die Fakulteit Veeartsenykunde by te staan met navorsing oor die moontlike verspreiding van Afrika-varkpes as siekte. Elke lid wat aansoek doen om sy plaas te registreer sal daarom versoek word om aan te dui of hy/sy bereid sal wees om ’n klompie bloedmonsters van varke wat gejag word op voorgeskrewe manier te versamel en na die kantoor van SA Jagters aan te stuur. Hiermee kan ons ’n bydrae lewer om bevestiging te kry of die endemiese voorkoms van Afrika-varkpes versprei het buite die bekende gebiede waar vlakvarke voorheen voorgekom het.

Laastens wil ons graag ons dank betuig aan dr. Mpo Maja, dr. Leana van Rensburg en al hulle kollegas wat behulpsaam was met hierdie magtigingsproses. Baie dankie vir hulle besonderse samewerking om hierdie magtiging van permitte vir SA Jagters moontlik te maak.