MAMBA BULL’S-EYE BENCHRESTSKIETRAAM
As jy ’n bobaasskut benodig, maar nie een ken nie, is hierdie produk vir jou.
Wanneer jy die ware akkuraatheid van jou geweer/ladingkombinasies wil toets, is dit noodsaaklik om ’n uiters stabiele rus te gebruik. Die meeste van ons toets ons gewere en ladings van skietbanke af met een of ander rus, maar die feit bly staan dat ons eintlik steeds ons eie vermoë ook toets omdat daar interaksie tussen die skut en die geweer is.
HOE NOU GEMAAK?
Die beste toetsmetode is om alle menslike kontak met die geweer te vermy tydens die afvuur van die skoot. Dis waar die sogenaamde rail-gun, waar die wapen stewig in ’n apparaat vasgeklem word, die geweer se terugskop deur die apparaat self opgeneem word en die sneller hidroulies afgedruk word, so ’n goeie beginsel is. ’n Rail-gun is dus ’n geslote stelsel, wat heel- temal sonder negatiewe menslike invloed is tydens die afvuur van die skoot.
Die tydsverloop vandat die skut besluit om die sneller af te druk totdat die koeël die loop verlaat, staan bekend as die “ewigdurende sekonde”. Dit is dan ook gedurende hierdie kort tydjie wat ’n mens die skoot kan opfoeter deur nie die sneller mooi egalig af te druk nie, te skrik vir die skoot en/of die geweer nie doodstil op teiken te hou nie.
Om hierdie probleem vir gewone skuts te oorkom, het Cassie Nienaber van Mamba-Reloading dus ’n skietraam ontwerp wat, soos ’n rail-gun die menslike invloed uitskakel. Cassie se Bull’s-eye Benchrest doen die volgende: Die geweer word só stewig in die staander gemonteer dat die raam en geweer ’n
eenheid vorm; Die raam se stewige, soliede konstruksie ondersteun die geweer so goed dat dit doodstil op die teiken gerig bly; Die kolf se skopkussing rus agter teen ’n houer daarvoor terwyl die geweer self op verskeie plekke stewig aan die raam geanker word; Die raam bestaan uit ’n onderste helfte wat doodstil en vas op die tafel staan terwyl die boonste deel onder terugskop, vry terug beweeg; Die boonste raam beweeg baie glad op ’n sisteem van ronde chroomstawe en liniêre rollaers; Die boonste raam se beweging word deur spiraalvere beheer sodat die energie geleidelik opgeneem word en dit nie met ’n harde slag tot stilstand kom nie; Hierdie veer is ontwerp sodat dit die geweer doodstil op die teiken gerig hou tydens die moontlike bewegings wat veroorsaak word deur die afset van die slag- dop, ontsteking van die dryfmiddel, impak en gravering van koeël in die loop en die wringkrag veroorsaak deur rotasie van die koeël in die loopgroewe; Al bogenoemde verseker dus dat die geweer doodstil gerig bly tydens daardie “ewigdurende sekonde”; Mamba voorsien ’n eenvoudige hidrouliese stelsel met twee plastiek inspuitings wat aan mekaar verbind is met dun sjirurgiese pyp; Hierdie hidrouliese stelsel maak aan die geweer se snellerbeuel vas; Die sneller word hiermee afgedruk sonder dat die skut enigsins aan die geweer of raam raak en sodoende word negatiewe menslike invloede heeltemal uitgeskakel. Die geweer word só stewig aan die skietraam geanker dat die raam en geweer ’n integrale eenheid vorm. Voor elke skoot het die skut slegs nodig om die geweer/teleskoop presies op die teiken te bring.
DIE TOETS
Goed, dit is nou in teorie hoe die Bull’s-eye Benchrest werk, maar hoe werk dit in die praktyk?
Cassie Nienaber en Koos Barnard (SA JAGTER/HUNTER se redakteur) het baasskut Flippie van Tonder gevra om te help. Flippie is een van die top-skuts van die SA Jagters vereniging ,’ n man met Proteakleure in Galleryskiet en ’n trofeekas vol skiettoekennings. Hy het sekerlik geen bekendstelling nodig nie. Flippie het ook ’n ten volle geakkrediteerde binnenshuise skietbaan onder sy huis in Pretoria (die enigste van sy soort in die land). Koos en Cassie het verlede jaar op 21 Desember die Bull’s-eye Benchrest op Flippie se skietbaan gaan toets.
Om te kyk of die skietraam werklik werk, is Flippie gevra om teen die skietraam te kompeteer op 100m. Die idee was om te sien of Flippie beter kon skiet as die skietraam. Eers het Flippie met twee van sy eie kompetisiegewere vyf skote elk vanaf sy eie Farley-rus geskiet en sewe skote met Cassie se Howa .243. Daarna is dieselfde gewere in die skietraam opgestel en daar is weer vyf skote elk geskiet met Flippie se gewere en sewe skote met Cassie se Howa .243 Win. Flippie se groeperings en die skietraam s’n is toe met mekaar vergelyk (sien foto’s).
Soos julle kan sien, kon Flippie nie die skietraam wen nie, maar beide hy en Koos het sekere voorstelle gemaak hoe die skietraam nog verder kon verbeter – onder meer die meganisme wat vir die fyner linksen regsstelling verantwoordelik is om die geweer presies op teiken te bring.
Hierdie mooi groeperings met die skietraam beteken eintlik dat wanneer ’n gewone skut die Mamba-skietraam gebruik, dit net so goed is asof hy vir Flippie, met sy uitsonderlike vermoë, kry om sy geweer en ammunisie se akkuraatheid persoonlik vir hom te kom toets.
Bitter min van ons is in Flippie se liga en daarom het Cassie dit ook goed gedink om die »
» skietraam met gewone, deursneeskuts te toets. Op 20 Januarie het Frans Strydom, Kobus Rossouw, Kobie Griesel, Tony de Beer en Cassie afgesit na die Premier-skietbaan naby Cullinan. Die skuts is uitgedaag om met hul eie gewere en herlaaide ammunisie teen die skietraam mee te ding. Ongelukkig was skiettoestande daardie dag bitter sleg – dit was koud, ’n mis- reëntjie het elke nou en dan geval en daar was deurentyd rukwinde van tot 30km/h. Alhoewel skiettoestande swak was, het dit vir almal gegeld (en ook vir die die skietraam).
Die meegaande foto’s spreek boekdele – dit is duidelik uit die resultate dat die Bull’s-eye Benchrest beslis beter skiet as gewone skuts. Vir diegene wat dus nie soos Flippie ’n baasskut is nie, is hierdie skietraam aan te bevole. Dit sal jou in staat stel om jou geweer/ladingkombinasie se ware potensiaal self te meet.
Volg die volgende skakel: https://youtu.be/6DzdZAx0M3I. In dié video kan jy presies sien hoe die Bull’s-eye Benchrest werk.
Die Bull’s-eye Benchrest se gewone prys is R7 800, maar ’n beperkte aantal is beskikbaar aan leser steen die bekendstelling prys van R 6800. * Vir meer inligting kontak Cassie via www.mamba-reloading. co.za