’N OPLOSSING VIR BRILSKU SKUTS
Speel verkleurmannetjie met dié veeldoelige skietbril.
Met oogbeskerming in die vorm van skietbrille, (deesdae verpligtend op die meeste skietbane), is dit seker logies dat ’n groot verskeidenheid van hierdie produkte tans aangebied word.
Vir baie mense is die dra van ’n skietbril ’n lastigheid (veral vir diegene wie se oë nog goed genoeg is om sonder voorskriflense te kan skiet) maar dit is ook ’n feit dat oogbeskerming uiters belangrik is. Diegene wat al aan die ontvangkant was van skrapnel of kruitpartikels in die gesig nadat ’n skoot afgevuur is, sal kan getuig hoe belangrik oogbeskerming is. Vele mense se oë is al gered bloot weens die feit dat hulle skietbrille, veiligheidsbrille of selfs ’n gewone bril met voorskriflense gedra het.
Nou ja, soos die spreekwoord lui, soveel hoofde soveel sinne – hoe meer mense jy het wat skietbrille benodig, hoe meer menings en voorskrifte sal jy kry oor wat nou eintlik die ideale produk is.
Teen die einde van 2019 het ek tydens ’n roetinebesoek aan my oogarts navraag gedoen oor skietbrille met voorskriflense en hy het my vertel van die Evolution-skietbril. Omdat dit gelyk het asof dit kon werk, het ek besluit om een te toets.
VERSKILLENDE LENSE
Dié bril bestaan uit ’n raam wat twee stelle lense kan neem – kleiner lense van soortgelyke grootte as gewone voorskrifbrille, en groter, gekleurde lense. Die deel wat die kleiner lense neem, is integraal tot die raam en van sagte plastiek gemaak. Normale, ongekleurde lense word in die fabriek daarin gepas. Saam met die bril word vier gekleurde lense voorsien wat aan die raam knip en ’n skarnier het sodat dit kan opwip of opswaai (sien foto). Die doel hiervan is om die verskillende kleure lense te kan gebruik na gelang van verskillende ligtoestande. Lense wat kan opswaai het twee voordele: sou die lig só verander terwyl jy skiet dat jy nie ’n gekleurde lens nodig het nie, swaai jy bloot die kleurlens op of haal dit af en gebruik die gewone ongekleurdes; stap jy skielik uit helder lig in ’n donker vertrek in of wil jy om een af ander rede nie die kleurlens gebruik terwyl jy met mense gesels of iets anders doen as skiet nie, swaai jy ook net die gekleurde lens op.
Die groot voordeel van hierdie bril is dat jy voorskriflense kan pas in die deel wat die kleiner, ongekleurde lense neem. Vir my as jagter is dié opsie nogal voordelig. My oë het só verswak dat ek nie meer sonder ’n bril kan jag nie, veral in die Bosveld waar jy soms fyn moet kyk om wild agter digte plantegroei raak te sien. Om ’n been, horing, stert wat swaai of enige klein lyfdeel raak te sien in digte bos of skaduwee, benodig ek dus ’n voorskrifbril.
My oë het ook oor die jare heen sensitief geraak vir skerp sonlig omdat my werk vereis dat ek lang ure in geboue voor die rekenaar moet deurbring. Dus jag ek baie kere met ’n donkerbril. Dit kan nogal lol as jy vroegoggend in die skemer begin stap en ook laatmiddag, as die skemer daal, nog in die veld is. Die oplossing vir my was om ’n donkerbril én ’n gewone een met ongekleurde lense saam te neem veld toe.
Met die Evolution-bril is die probleem opgelos, want ek knip bloot die gekleurde lens van my keuse aan (gewoonlik maar die “normale” donker lens vir dagdra). Dan kan ek die lens na willekeur deur die dag opswaai of laat sak, na gelang van die ligtoestande. ’n Mens moet net in gedagte hou dat die lense in die opswaai-posisie ongeveer 90-grade van jou gesig af wegstaan. Jy kan dit dus makliker stamp teen voorwerpe of, as jy skiet, mag die lens dalk teen die teleskoop se oogstuk druk (dit hang af van die skietposisie van jou kop en die hoogte van die geweer se wangstuk).
VERSTELBARE OPSIES
Die ore van die raam kan buig sodat die draer dit kan verstel om die beste om sy of haar kop te pas. Dieselfde geld vir die neusbruggie of neusstuk. Dit bestaan uit twee “beentjies” van sagte metaal elk met ’n kussinkie (sien foto). Deur die beentjies te buig, kan die bruggie verstel om die bril hoër of laer te skuif op jou gesig en selfs ’n bietjie links of regs ook.
Om by verskillende ligtoestande aan te kan pas, is die kleure van die vier aankniplense geel, donkerblou, perserig of spiritusblou en oranje. Skuts is oor die algemeen lief om geel lense te gebruik omdat dit jou hele omgewing helderder laat vertoon. Kleiduifskuts gebruik soms ander kleure lense omdat die oranjekleurige kleie dikwels beter sigbaar is daarmee teen die blou lug of ander agtergrondkleure, as met geel lense.
Een van die algemeenste probleme met alle brille is dat die gebruiker dikwels teen die raam vaskyk of teen die gedeelte wat die neusbruggie huisves omdat daardie deel soms te breed is. Vir regshandige skuts is dit by die linkerkantste boonste hoek van die regterlens waar jy teen die raam vaskyk. Dit is dus noodsaaklik dat die bril hoog genoeg op jou gesig sit sodat die raam nie jou visie versper nie. Dit gebeur veral met gewere waar jy jou kop moet laat sak om jou wang teen die wangstuk te pas. Ek het gevind dat die meeste brille en skietbrille die beste werk as die geweer se wangstuk hoog is sodat jy jou kop regop kan hou (dan moet die teleskoop natuurlik ook hoër as normaalweg gemonteer word). Dis heel maklik om met doelgeboude skyfskietgewere met hoë wangstukke by ’n bril aan te pas. Jaggewere is egter ’n ander saak.
EKSPERIMENTEER EN BEPROEF
Die Evolution-bril werk goed, maar ek het aanvanklik baie gesukkel daarmee as ek met ’n geweer skiet omdat die primêre lense klein is en ook omdat die bril te laag op my gesig gesit het. Selfs deur die neusbruggie so te verstel dat die bril so hoog as moontlik op my gesig sit, het ek nog steeds by die linkerkantse, binneste hoek van die lens teen die raam vasgekyk. Dit was eers na vele eksperimente en toe ek die neusbruggie só verstel het dat die hele bril effens na links skuif op my gesig, dat ek die probleem kon uitskakel.
Omdat jy jou kop meer regop hou as jy met ’n pistool of rewolwer skiet, het ek van die begin af geen probleme ondervind met dié wapens met die Evolution nie. Gelukkig laat die neusbruggie jou toe om dit so te verstel dat die bril ook links of regs kan skuif. Met dié probleem opgelos, kon ek toe die Evolution baie effektief begin gebruik en dis wat ek die afgelope vier maande gedoen het.
Hierdie bril sal heel moontlik nie in almal se smaak val nie of dalk nie by alle skuts se gesigvorm en grootte pas nie, maar in my geval het dit gewerk omdat ek die neusbruggie kon manipuleer. Dit is altyd beter (indien moontlik) om jou geweer saam te neem na die oogkundige en dan daar deur enige bril te kyk wat jy beplan om te koop terwyl jy aanlê met die geweer (dit kan wel by sommige oogkundiges op ’n diskrete plek gedoen word).
Evolution-brille met die gewone ongekleurde lense en die vier gekleurdes verkoop teen so rondom R900. Vir voorskriflense sal jy natuurlik ekstra moet opdok.
Soos met enige soortgelyke produkte, sal die Evolution-bril vir sommige mense werk en vir ander glad nie. Die beste manier om uit te vind, is om een te gaan “toetsbestuur”.
* Ek het my bril by Spectacle Warehouse in Faerie Glen in Pretoria raakgeloop. Vir meer inligting kontak hulle by 012-991-4911 of besoek hul webtuiste by www.spectacle warehouse.co.za.