GHONGSKIETKOMPETISIE
Ons herinner julle graag aan ons (SA JAGTER/HUNTER-tydskrif) se groot ghongskietkompetisie op 9 Mei naby Amersfoort op die plaas van die bekende motorfietsman, Jan “Staal” du Toit. Sy plek staan bekend as die Country Trax Off-Road Riding Academy. Dis 46km van Amersfoort af en 73km suid van Ermelo. Jan is bekend vir sy motorfietsakademie en die motorfietstoere wat hy aanbied. Hy was onlangs weer op TV toe die bekende Voetspore- span van Johan Badenhorst daar besoek afgelê het.
Hierdie skiet beloof om ’n baie interessante en lekker een te wees. Safari Outdoor is ons hoofborg en die skiet sal ook bekend staan as die SAFARI OUTDOOR SA JAGTER/HUNTER GHONGSKIET. Safari self borg pryse ter waarde van R100 000 en ons het reeds pryse versamel met ’n totale waarde van R140 000 en daardie bedrag sal nog groei. Daar is onder andere ’n Swarovski Z6-teleskoop as prys. Al die pryse wat aangebied word, is produkte wat by die onderskeie Safari Outdoor-winkels te koop aangebied word.
Spanne kan inskryf, maar die klem sal val op individuele deelnemers en hulle sal in aanmerking kom vir die groot pryse. Spanne wat die eerste drie plekke inneem sal ook pryse ontvang, maar dit sal kleiner pryse wees as die individuele pryse. As gevolg van die groot aantal pryse, behoort baie manne iets op die dag te kan wen.
Daar is oornaggeriewe op Jan du Toit se plaas. Om plek te bespreek kontak hom gerus by 083-669-7283. Ons behoort teen 09:00 die oggend te begin skiet en sal om 16:00 klaarmaak, waarna die prysuitdeling plaasvind.
Besprekings vir hierdie ghongskiet is nou oop en julle kan die skakel bit.ly/gong2020 gebruik om in te skryf.
Volg net die instruksies. Al die nodige inligting oor die ghongskiet verskyn saam met die inskrywingsvorm. Alle inskrywings word aanlyn gedoen en beloop R400 per persoon of R2 000 per span van vyf. Die sluitingsdatum vir die inskrywings is 28 April 2020.
Ons beoog om 150 skuts te trek vir hierdie kompetisie en vra julle ondersteuning om dit moontlik te maak. Dit gaan een van die heel grootste ghongskietkompetisies van 2020 wees.