STEYR – STYLVOLLE OOSTENRYKER
DIE HARTBEES, ONS VLUGVOETIGE VLAKTEBOK
Die Oostenrykse firma, Steyr, is baie jare reeds beken das’ n vervaardiger van kwaliteit jaggewere. Die Ste y r-stal bevat vandag egter nie net jaggewere nie, maar ook ’n hele rits innoverende en hipermoderne handwapens en masjiengewere vir militêre en siviele aanwendings. Inyathi Sporting Supplies, Steyr se plaaslike agent, het onlangs twee Steyr-jaggewere, ’n CL II en ’n CL II SX, aan SA JAGTER/HUNTER verskaf om te toets en soos te verwagte, is daar baie om oor te skryf.
Ten einde die speelveld gelyk te hou, is beide die Steyr-gewere wat verskaf is, vir die .308 Winchester gekamer. Inyathi Sporting Supplies is ook die plaaslike Nosler-agente en het goedgunstiglik ’n paar pakke Nosler Trophy Grade-ammunisie, gelaai met 165gr-Nosler Ballistic
Tip-koeëls, sowel as ’n Steiner Ranger 4-16x56-teleskoop verskaf. Om meer oor die Steinerteleskoop te lees, sien die aparte toetsverslag op bladsy 42.
WERKESEL ONDER DIE VERGROOTGLAS
Die Steyr CL II SX is ’n werkesel. Hierdie model het ’n groen sintetiese kolf met sagte rubber
insetsels op die pistoolgreep en voorlaai ten einde ’n goeie greep op die geweer te verseker, veral in die nat weersomstandighede wat gereeld in Europa voorkom. Die 22”-mediumprofielloop maak die geweer lekker handig om te hanteer en die metaal het ’n dowwe swart afwerking wat prakties en aantreklik is.
CL II VIR DIE FYNPROEWER
Die CL II is so ietwat van ’n opgradering van die CL II SX en is bepaald nié ’n werkesel nie. Die geweer het ’n Europese okkerneuthoutkolf wat in die tradisionele Beierse ( Bavarian) styl gekerf is. Die voorlaai se punt het ’n donker, kontrasterende houttip wat in ’n kleinerige schnabel eindig. Die wangstuk is ook tipies Beiers en is effe rond, ook in die tradisionele styl.
Die kolf het ruitwerk op beide die voorlaai sowel as die pistoolgreep. Die ruitwerk is nie die tradisionele tipe nie, maar het amper die voorkoms van klein visskubbe. Dit is glad nie onaantreklik nie, maar ek het gewonder hoe maklik die ruitwerk sal wees om te herstel as dit skade sou moes opdoen as gevolg van ’n ernstige krap of duik. Alhoewel die pistoolgreep ’n Wundhammer-verdikking (beter bekend in goeie Afrikaans as ’n palm swell) het, is dit nie oordadig gedoen nie en die kolf voel gemaklik in jou hand.
Die CL II se metaalwerk is afgewerk in ’n satyn-gebloude voorkoms wat weereens sag op die oog is. Dit is ’n blinker afwerking as dié van die metaal van die CL II SX, maar nie noodwendig só blink dat ’n jagter wat vroegmiddag in ’n bosveldpaadjie afstap met die CL II oor sy skouer, soos ’n wandelende neon-advertensiebord sal lyk nie. Net soos die CL II SX, het die CL II ’n 22”-loop, en draad vir ’n knaldemper is insgelyks reeds in die loop gesny. Vir diegene wat nie van ’n knaldemper op sy Steyr-jaggeweer gebruik wil maak nie, is beide gewere voorsien van ’n netjiese skroefdraaddoppie wat die skroefdaad verdoesel by die tromp. Volgens die Steyr-katalogus weeg die CL II SX met sy sintetiese kolf 3.4kg sonder ammunisie of ’n teleskoop, en die CL II met sy houtkolf is slegs 100g swaarder.
GEHAMERDE LOPE
Steyr maak gebruik van die hamerproses om lope te vervaardig. Dit behels dat ’n vormstuk of mandrel in die rou staalloop ( barrel blank) geplaas word nadat ’n gat daardeur geboor is. Hierdie vormstuk het die geweerloop se groewe in omgekeerde vorm op. Groot hamers “knie” of stamp nou die loop van alle kante af in die lengte daarvan aan die buitekant en so word die groewe in die loop gevorm deur die vormstuk wat binne-in geplaas is. Hierdie proses laat die kenmerkende riffels of hamermerke aan die buitekante van die lope wat op Steyr-gewere gesien word. Daardie tipe merke word op alle gehamerde lope gevind, maar ander vervaardigers masjineer dit af terwyl Steyr dit aan die loop los. Dit het oor die jare heen ’n Steyr-handelsmerk geraak.
DIE SBS-AKSIE, SNELLER EN MAGASYN
Beide hierdie Steyr-gewere is gebou op Steyr se SBS-( Safe Bolt System)- aksie. Die aksies word sedert 1996 vervaardig en het vier sluitnokke voor op die slot, sowel as ’n ekstra veiligheidsnok net voor die slothandvatsel. Die slothandvatsel hoef slegs 60 grade opgelig te word om die slot te ontsluit sodat die aksie weer oorgehaal kan word. Dis ook maklik om te sien of die aksie gespan is of nie, deur net na die slothandvatsel te kyk. Indien die aksie nie gespan is nie, is die slothandvatsel plat teen die kolf. Span die aksie, of beweeg die veiligheidsknip tot die rooi knoppie sigbaar is, en die slothandvatsel staan duidelik ’n entjie weg van die kolf.
Die SBS-aksie maak van die »
» sogenaamde hook and plunger- sisteem gebruik vir ekstraksie van doppe, so die aksie is dus van die stootvoertipe. Dit is ’n sisteem wat nie gewild is onder jagters van gevaarlike wild nie, maar beide die Steyrtoetsgewere het foutloos gefunksioneer in die verband. Patrone het glad uit die magasyn gevoer en doppe is met mening uitgewerp. Ek het hard probeer om die CL II SX te kry om te stoor, maar ek was onsuksesvol, en dus het die gewere baie betroubaar gefunksioneer tydens die toets.
Die gewere se veiligheidsknip was ook maklik en gerieflik om te verstel. Die veiligheidsknip word beskryf as ’n roller tang safety en is ’n wieletjie van sintetiese materiaal wat in die bokant van die pistoolgreep, net agter die slotomhulsel, in die kolf geleë is. Dit het drie posisies: as dit vorentoe beweeg word, is die geweer gereed om afgevuur te word, en is ’n rooi knoppie op die veiligheidsknip sigbaar. In die middelposisie (wit kolletjie sigbaar) kan die kamer veilig ontlaai word en as die veiligheidsknip na agter beweeg word, (grys knoppie sigbaar) is die geweer veilig.
SNELLERMEGANISME EN MONTERINGS
Steyr maak in hulle katalogus melding dat hulle gewere beskikbaar is met enkel- sowel as dubbel sneller meganismes. Albei die toets gewere het enkel sneller meganismes en die aftrek op beide was uitstekend, met geen sleep nie. Sou ’n mens ’n ligter aftrek verlang, is dit so eenvoudig as om die geweer te span en die sneller vorentoe in die snellerbeuel te druk. Die sneller verander dan in ’n haarsneller wat slegs ’n skewe gedagte nodig het om af te gaan. Alhoewel ek nog nooit’ n voorstander van onnodig ingewikkelde sneller meganismes was nie, kon e knie met die konsep fout vind nie, en die snellers het seepglad gefunksioneer.
Ste y r-gewere in standaard kalibers soos die .308 Winchester word verskaf met ’n vierskootdubbelkolommagasyn. Soos met omtrent alle Europese gewere, is die magasyn vinnig verwyderbaar (quick detachable). Sou die magasyn om een of ander rede verlore raak, is plaasvervangermagasyne beskikbaar.
Uit my kinderdae onthou ek dat dit in die verlede (ek praat hier van die 1980’s) soms moeilik was om teleskoopmonterings vir Steyr-gewere in die hande te kry. Monteerblokke waarop Weaver-tipe ringe gemonteer kan word, word standaard saam met albei die gewere verskaf. Dit behoort dus kinderspeletjies te wees om die teleskoop van jou keuse op die Steyr te monteer.
OP DIE SKIETBAAN
Nog iets wat ek uit my kinderdae onthou, is dat Steyr-gewere nogal akkuraat skiet, en die toetsgewere het nie teleurgestel nie. Steyr waarborg dat hulle fabrieksgewere onder ’n duim op 100m sal skiet, en ek was nuuskierig om te sien of die fabriekswaarborg water hou. Met die Nosler-ammunisie was dit helaas relatief maklik om (veral met die CL II SX) drieskootgroeperings van onder ’n duim te kry. Die sintetiese kolf het my goed gepas en die terugskop was baie hanteerbaar.
Die beste groepering wat ek oor die sandsakke kon behaal, het ongeveer ’n driekwart duim gemeet, en dit was duidelik dat Nosler-ammunisie en Steyr-gewere goeie pasmaats is. Steyr is bekend vir die skerpskuttergewere wat hulle vervaardig vir die militêre mark, en vir hierdie betrokke aanwending is akkuraatheid ’n voorvereiste. Dit is verblydend om te sien dat Steyr se jaggewere ook bloubloed in hulle are het wat akkuraatheid aanbetref.
’N ENKELE NEGATIEWE ASPEK
Alhoewel beide die Steyr-gewere verskeie positiewe eienskappe het, moet ek wel noem dat daar iets is wat my veral van die CL II SX geïrriteer het: Die magasyn het in die geweer geratel, en dié geratel was duidelik hoorbaar elke keer wanneer ek die geweer optel. Sodra daar egter patrone in die magasyn gelaai word, verdwyn die irritasie onmiddellik. Ek moet byvoeg dat hierdie betrokke geweer ’n toetsmodel was en dus al heelwat skote geskiet het, so die probleem is waarskynlik maklik om te diagnoseer deur eenvoudig net ’n nuwe magasyn met ’n sterker veer te gebruik. Die CL II, daarenteen, het geen ratels of ander slegte gewoontes openbaar nie.
Die CL II, sowel as die CL II SX het baie om die jagter te bied. Dié twee gewere is bepaald nie op dieselfde mark gefokus nie, en waar die CL II SX meer van ’n werksgeweer is wat in alle weersomstandighede gebruik kan word, is die CL II met sy houtkolf en fyn ruitwerk op ietwat meer van ’n fynproewersmark gemik. Prysgewys verkoop die CL II SX in die handel vir ongeveer R30 000 terwyl die CL II se voorgestelde verkoopsprys ongeveer R45 000 is. As jy op soek is na ’n jaggeweer, vervaardig deur ’n firma soos Steyr (met ’n jarelange reputasie vir kwaliteit) is die CL II SX sowel as die CL II beslis ’n kykie werd. * Steyr-produkte word deur Inyathi Sporting Supplies ingevoer. Vir groothandelnavrae kontak hulle by 012-808-9911.
Die CL II, sowel as die CL II SX het baie om die jagter te bied.