STEINER RANGERTELESKOOP
Steiner, die Duitse vervaardiger van kwaliteit-optiese produkte, het in 2017 hul 70ste verjaardag gevier. Dié maatskappy is in 1947 te midde van die ruïnes van na-oorlogse Duitsland deur Carl Steiner gestig en Steiner vervaardig vandag ’n wye reeks produkte, insluitend verkykers en teleskope vir militêre en siviele aanwending.
Steiner se Suid-Afrikaanse agente, Inyathi Sporting Supplies, het onlangs ’n Steiner Ranger 4-16x56-teleskoop aan SA JAGTER/HUNTER verskaf om te toets. Die teleskoop was op ’n Steyr CL II SX-geweer in .308 gemonteer en dus was die skietbaan die ideale plek om die Steiner-teleskoop uit te toets.
Die Ranger 4-16x56-teleskoop is, volgens Steiner se webtuiste, aan die gewigtige kant met ’n gewig van 720 gram. Die 56mm-objektiewe lens dra ongetwyfeld by tot die teleskoop se gewig, maar met ’n maksimum vergroting van 16x is hierdie teleskoop meer gerig op die langafstandmark. Die buisdeursnee is 30mm en soos dit enige goeie teleskoop betaam, bied Steiner ’n tienjaar-meganiese waarborg op hulle produk.
VERSTELLINGSMEGANISME
Die Ranger bied parallaksverstelling deur middel van ’n stelknop aan die linkerkant van die buis – parallaks is verstelbaar van 50m tot sover as wat ’n mens wil skiet. Die kruisdraad skuif 1cm op ’n afstand van 100m vir elke kliek se verstelling. Die verstellingsknoppe verstel gemaklik, hoewel die klieks baie fyn en ietwat “sponserig” is (by gebrek aan ’n beter beskrywing) en dit het konsentrasie geverg om die regte hoeveelheid klieks te stel. Vir vertikale verstelling is 85 klieks beskikbaar, en vir horisontale verstelling 55. Die toetsmodel is verskaf met ’n ekstern-verstelbare, vertikale verstelknop. Ten einde te sorg dat die teleskoop se verstelling in plek bly, kan die knop in plek gesluit word deur twee skroefies in die knop self met ’n klein skroewedraaier vas te draai.
OPTIESE BEELD
Die optiese beeld van dié teleskoop is na my mening uitstekend. Die toetsmodel het Steiner se 4A-1 verligte kruisdraad gehad en die intensiteit van die rooi kolletjie was maklik om te verstel deur eenvoudig die verstelknop aan die linkerkant van die buis te draai. Daar is merkies op die verstelknop, en die intensiteitstelling van 0 tot 6, is wat Steiner die “moonlight mode” noem. Die verstellings van 7 tot 11 is vir gebruik in daglig.
Met ’n voorgestelde verkoopprys van ongeveer R13 000 is die Steiner Ranger 4-16x56 nie die goedkoopste teleskoop op die mark nie, maar as dié teleskoop vergelyk word met sommige van sy teenstanders op die mark, is dit duidelik dat hierdie Steiner-produk goeie optiese kwaliteit teen ’n kompeterende prys bied.
* Inyathi Sporting Supplies bied volledige naverkopediens op Steiner-produkte en hulle kan telefonies gekontak word by 012-808-9911 vir groothandelnavrae.