CORONAVIRUS STUIT DIE HEROPENING VAN OLIFANTJAGTE IN BOTSWANA
Die uitbraak en verspreiding van die Coronavirus het ’n ernstige demper geplaas op Botswana se eerste jagseisoen sedert 2014, waarin olifante ook op die spyskaart is.
Botswana se regering het aan die begin van April ’n noodtoestand aangekondig, sowel as ’n algehele nasionale inperking van 28 dae wat op 2 April ingetree het. Daar is ook reisbeperkinge ingestel wat beteken reisigers van lande soos Brittanje, Italië en die VSA nie na Botswana kan reis nie.
Verskeie Botswana-gebaseerde jagondernemers het reeds te kenne gegee dat baie van die jagte wat vir die 2020-seisoen bespreek was, alreeds uitgestel of gekanselleer is. Baie van hierdie ondernemers het die Botswana-regering versoek om die amptelike jagseisoen te verleng gedurende 2020, om hulle in staat te stel om hulle verliese te beperk aangesien hulle reeds vir dié seisoen hul jaglisensies betaal het.