JAGPUNTE VIR 'N BOOG
Kies die korrekte punte vir jou jagboog.
Kies die korrekte punte vir jou jagboog.
Wat heel voor aan ’n pyl is, maak baie saak, want dit is die gedeelte wat die dier tref en moet doodmaak. Moet my nie verkeerd verstaan nie, jy moet gewis ’n boog gebruik waarin jy vertroue het en wat akkuraat skiet. En ja, jy moet skootplasing oefen om seker te maak die pyl tref waar jy mik. So moet jy ook sorg dat jy jou prooi met oorleg kies en net skiet wanneer die dier reg staan en jy weet waar om te mik om die longe en die hart te tref. Maar al skiet jy so akkuraat soos ’n skerpskutter en is jou boog dalk die nuutse en vinnigste op die mark, en al tref jy die bok op die regte plek, kan jy steeds die skoot verbrou omdat die jagpunt nie sy werk gedoen het nie. Derhalwe is die jagpunt van die allergrootste belang.
WAARNAMOETJYKYK?
Wanneer ons ’n jagpunt kies is daar ’n klomp faktore om in ag te neem, soos byvoorbeeld die grootte, ontwerp, duursaamheid, akkuraatheid en ook hoe skerp dit is. Ons kan oor baie tegniese aspekte praat, maar dit sal waarskynlik nie van praktiese waarde vir die meeste boogjagters wees nie, daarom gaan ek dit eerder vermy.
Dit is egter belangrik om te weet dat die werking van ’n pyl baie verskil van dié van ’n koeël. ’n Pyl werk soos ’n mes- of spiessteek: dit maak dood deur te sny en bloeding te veroorsaak. Hoe meer skade dit binne die dier veroorsaak en hoe vinniger die dier bloei, hoe meer effektief is die skoot. Indien die pyl-en-jagpuntkombinasie verkeerd is, kan die dier lank neem om dood te gaan of selfs die skoot oorleef.
Verder moet elke nuwe boogjagter weet dat wild nie met ’n gewone oefenpunt (field point) gejag kan word nie. Al is dié punte skerp en lyk dit soos ’n
koeël is dit geensins effektief om diere mee te jag nie. Selfs ’n skoot in die hart met ’n oefenpunt is ’n groot waagstuk en moenie eers probeer word nie.
DIE ERA VAN MEGANIESE JAGPUNTE
Jare gelede, toe ek met pyl en boog begin jag het, was daar nog baie weerstand teen meganiese jagpunte. Die meeste boogjagters het net met vaste punte gejag omdat hulle bang was die meganiese punt gaan nie heeltemal ontplooi wanneer dit die dier tref nie en dan sit jy met ’n gekweste dier. Deesdae jag die meeste boogjagters egter met meganiese punte en die gebruik van vaste jagpunte is ver in die minderheid.
Vastelem-jagpunte bestaan al eeue lank, terwyl meganiese punte relatief onlangs ontwerp is. Die eerste modelle wat kommersieel vervaardig is, het in die laat-1980’s hul verskyning gemaak. Ek het in 1996 met ’n tradisionele boog begin jag en het vaste punte verkies. In 2000 het ek ’n kragboog by Don Castrup van PSE gekry en het van die begin af meganiese punte gebruik wanneer ek daarmee jag. Ek het nie ’n enkele geval gehad waar ek ’n bok gekwes of verloor het weens ’n meganiese punt wat nie ontplooi het nie. Nie al die pyle wat ek geskiet het, was goed nie en ek het wel ’n paar bokke gekwes, maar dit was altyd weens my eie tekortkominge en foute, en nie as gevolg van die boog, pyl of jagpunt nie.
Beteken dit dat vastelem- of meganiese jagpunte nooit misluk nie? Nee, dit gebeur soms, maar as jy die punte sorgvuldig kies, seker maak hulle is vlymskerp en alles goed nagaan voordat jy dit gebruik, is die kanse bitter skraal dat hierdie stukkie toerusting jou sal faal.
Ek het natuurlik ook seker gemaak dat ek meganiese jagpunte gebruik wat deeglik getoets en duursaam is. Destyds was Rocket Steelheads nog redelik nuut op die mark, maar Adriaan Rall, ’n baie ervare boogjagter, het dit getoets en aanbeveel. Hy was nie verkeerd nie. Ek het sedertdien baie bokke suksesvol daarmee gejag en gebruik dit steeds.
Daar is deesdae baie meganiese jagpunte wat effektief is en waarskynlik meer skade doen as die punte van 20 jaar gelede, soos byvoorbeeld ’n Rage Hypodermic-meganiese jagpunt en ander.
DIE NIMMEREINDIGENDE DEBAT
Daar is ’n gesegde onder boogjagters dat die beste jagpunt die jagpunt is waarmee jy jou laaste bok platgetrek het. Dit is ook waarskynlik waarom die debat oor wat die beste jagpunt is nooit sal ophou nie. Soos reeds genoem, glo baie boogjagters dat net vaste jagpunte vertrou kan word, terwyl ander reken dit vlieg nie dieselfde as hulle oefenpunte nie en daarom verkies hulle meganiese jagpunte. Sommige jagters gebruik punte met drie of vier lemme terwyl ander tweelem-jagpunte verkies.
Op navraag by boogjagwinkels is dit duidelik dat Rage se meganiese jagpunte tans die beste verkoop. Die rede hiervoor is die lemme se groot snyoppervlakte wat baie skade doen wanneer dit deur die bok sny. Meganiese punte is maklik om in te stel en dié punte vlieg net soos die punte waarmee boogjagters oefen. Die jagter weet dus wanneer hy ’n pakkie »