SA JAGTERS EN AANPASSING BY VERANDERING
ANDRÉ VAN DER MERWE
Covid-19 het die wêreld soos ons dit geken het erg deurmekaargekrap, beperkings op ons geplaas en in sekere opsigte ons lewens onherroeplik verander. Die afgelope jaar (sedert April 2020) leef ons in Suid-Afrika onder omstandighede wat dit finansieel vir baie individue en besighede uiters moeilik maak. Elkeen van ons moet noodgedwonge baie kreatief en vindingryk raak om te oorleef – dít, saam met die bedreiging wat die virus inhou vir elkeen se gesondheidenlewe!
SA Jagters het gedurende 2020 die opsies vir die betaling van ledegeld heelwat uitgebrei om aan lede verskeie alternatiewe in moeilike finansiële tye te gee. Hulle kon byvoorbeeld hul ledegeld in ses paaiemente per jaar afbetaal. Hierdie stap, saam met honderde oproepe deur SA Jagters se administratiewe dames na lede om bystand te verleen waar nodig, soos met onder meer uitstaande ledegeld, het meegebring dat die ledetal tans (einde Maart 2021) op 43 701 staan. Dit verteenwoordig ’n groei van 1 584 oor die afgereeds lope 12 maande. Hiermee SA Jagters se dank aan al die lede se getroue ondersteuning oor die jare heen, maar veral oor die laaste jaar.
Kommunikasie met die lede van SA Jagters bly te alle tye ’n belangrike saak en die volgende media is tradisioneel gebruik om boodskappe oor te dra: SA JAGTER/HUNTER- en Man Magnum-tydskrifte (papier en elektronies), die SA Jagters-webwerf, e-pos, SMS en later ook WhatsApp. Sosialemedianetwerke soos Facebook en Twitter is die meer onlangs ontwikkelde kommunikasiemediums wat veral deur jonger mense en kinders verkies word en daarom het SA Jagters in die laaste paar maande ook ons hand hieraan gewaag. Lede kan ons nou ook op Facebook volg by https:// web.facebook.com/SAJagtersHunters (@SAJagtersHunters) en op Twitter by: @SAJagters.
Deur middel van hierdie media kan SA Jagters ’n groter teikenmark bereik om die Vereniging te bemark. Gesels gerus saam en deel die inligting met vriende en lede. SA Jagters se bewaringsblad op Facebook is bekend en deel gereeld inligting en nuus oor bewaringsaktiwiteite.
SA Jagters het ’n rykdom van suksesverhale op tak-, streeksen nasionale vlak wat aan die wêreld vertel kan word. Die Vereniging en die ongelooflike werk wat ons lede regoor die land doen, is een van die bes bewaarde geheime wat bestaan. Een manier om die inligting baie effektief deur middel van die sosiale netwerke te versprei, is met kort video’s. Die eerste twee hiervan is reeds deur middel van WhatsApp aan lede gestuur. Die eerste kort video het gehandel oor die afgelope vuurwapenamnestie terwyl die tweede een deur Boetie Kirchner handel oor jagverwante dienste aan lede. Julle kan verwag om in die toekoms heelwat meer kort video’s te sien. Stuur dit asseblief aan soos julle goeddink en vertel só die storie van en oor SA Jagters aan ander.
Nog veranderinge wat die Vereniging gedurende die Covid-19-inperkings geïmplementeer het, was aanvanklik vreemd, maar almal raak dit nou geleidelik gewoond en die voordele
daarvan al hoe duideliker. SA Jagters is bevoorreg om takke so wydversprei te hê as Musina in die noorde, Port Elizabeth in die suide, Springbok in die weste en Richardsbaai in die ooste. Met 81 takke regoor Suid-Afrika moet takbestuurslede, streekkoördineerders, Inyathiparkbestuurders en SA Jagters-raadslede baie lang afstande reis om vergaderings by te woon. Die gepaardgaande reis- en verblyfkoste moet ook gedra word. Op nasionale vlak vergader SA Jagters se raad alreeds sedert die tweede kwartaal van 2020 virtueel. Takke kommunikeer virtueel met lede en die Vereniging se bestuur hou ook virtuele vergaderings met bykans al 15 streke.
Virtuele vergaderings het die voordeel van groot besparings van koste en tyd vir al die partye. SA Jagters het in Mei 2020 ’n baie konserwatiewe nasionale begroting vir 2020/2021 opgestel en ’n groot deel van die koste van reis- en verblyfuitgawes is weggelaat ter wille van besparing – virtuele vergaderings soos hierbo verduidelik het dit moontlik gemaak.
Gedurende vlak 5 van die Covid-inperkings in April, Mei, Junie en Julie 2020 kon SA Jagters deur middel van virtuele vergaderings suksesvol met die Departement van Omgewingsake onderhandel om jag vir minstens die tweede helfte van die seisoen oopgestel te kry. Sonder virtuele vergaderings sou dit nie moontlik gewees het nie en sou die jagseisoen gedurende 2020 waarskynlik nie gerealiseer het nie. Vir ons as jagters sou dit ’n slag gewees het, maar vir die wildboere sou dit finansieel ’n ramp gewees het.
Hierdie tipe vergaderings en die gebruik van ander sosiale netwerke was een van die ligpunte die afgelope jaar. Sonder die kontak wat dit moontlik gemaak het, sou daar baie min interaksie tussen besighede, en tussen besighede en staatsdepartemente gewees het en sou die ekonomiese impak baie erger gewees het. Alhoewel dit nooit persoonlike kontak kan vervang nie, was dit selfs vir familie en vriende die enigste manier om kontak te behou.
Ná ’n aansoek in Mei 2020 by die minister van sport, kuns en kultuur, Nathi Mthethwa, is toestemming teen einde Julie verkry om skietbane te heropen. Saam met die vergunning was daar egter verantwoordelikhede onder die Covid-19-regulasies wat nagekom moes word. Takke se omstandighede verskil en elke tak moes dus die vereistes evalueer en self besluit wanneer hulle hul skietbaan/-bane kon heropen. Landswyd het die takke geleidelik hul skietbane geopen en tans is die streekskietkompetisies goed aan die gang en ons vertrou dat die huidige inperkings ons sal toelaat om die skietaktiwiteite vir die jaar te voltooi. Vir die skuts is dit ook vreemde omstandighede waaronder hulle deelneem, maar alle eer en dank aan die takke wat die proses baie suksesvol bestuur.
Een van SA Jagters se uitstaande kenmerke is dat ons dit nog altyd geniet het en daarop staatmaak om tydens ons verskeidenheid aktiwiteite direkte (aangesig tot aangesig) kontak met mekaar op tak-, streek- en nasionale vlak te maak en dit sal waarskynlik altyd so wees. Die afgelope jaar moes ons noodgedwonge aanpas en kreatiewe oplossings vind. Kom ons vertrou dat ons kan leer om so ver moontlik daarmee saam te leef, maar steeds streef om geleidelik weer al hoe meer by daardie aangesig-tot-aangesig-ontmoetings te kan uitkom.
Adapt or die kan as ’n holruggeryde gesegde gesien word, maar vir baie Suid-Afrikaners het dit die afgelope 12 maande ’n baie onaangename werklikheid geword. Vanaf SA Jagters se nasionale kantoor bly ons gefokus op diens aan ons lede en maak ons aanpassings waar moontlik om die veranderinge in ons omgewing aan te spreek tot ons almal se voordeel.