STEVENSON-HAMILTON: TROTS SUID-AFRIKAANS SEDERT 1994
Klere wat ook in die hitte werk.
JACQUES BOSHOFF
Stevenson-Hamilton se unieke kamoefleerdrag is een van die eerste goed wat baie van ons in die tas pak voordat die koue begin en die lope warm geskiet word. Hierdie kamoefleerdrag is só gewil donder Suid-Afrikaners dat baie ander maatskappye die kamoefleer patroon al probeer namaak het. As dit egter nie die Ste ven son-Hamilton handelsmerk dra nie, is dit beslis nie die ware jakob nie en ook nie van dieselfde gehalte nie.
Vir diegene wat nog nie weet nie, jy kan binne die kamoefleer patroon nege verskillende ontwerpe sien wat deel uitmaak van die groter prentjie: ’n renoster, twee sebras, ’n olifant, ’n olifantoog, hiëna, kameelperdkolle, ’n voël in ’n boom, dierspore by ’n dam en natuurlik doringbome. Om alles te eien is nogal ’n lekker uitdaging om die kampvuur – probeer dit gerus tydens jou volgende jagtog.
Soos die eienaar van die maatskappy, Thomas Bredenkamp, my vertel, is die grootste uitdaging met hul produkte dat ’n mens dit nie sommer deurdra en nuwes nodig het nie. Die maatskappy is ook baie bekend vir hulle groot reeks breëbandleeren materiaalhoede.
DIE TOETS
Ons het onlangs die geleentheid gekry om van Stevenson-Hamilton se klere te toets en het besluit om hulle gewone “danskerk-en-werk”-klere bos toe te vat. Aangesien die toets in middel Maart op ’n plaas net buite Musina in Limpopo was, wou ek natuurlik nee dankie sê vir enigiets wat my nog warmer kan laat kry, wat bykans enigiets sou wees. Gelukkig het Stevenson-Hamilton se hemde my behoorlik verbaas. Ek het in die warm Limpopo-son eers hulle kortmouhemp probeer en ja, soos ’n mens kan dink, het ek hom behoorlik natgesweet, maar dit het my nie gepla nie. Inteendeel, ek het ’n paar ander fabrikaat se hemde ook daar gehad wat ná ’n klein bietjie stap in die veld so styf aan my lyf vasgekleef het dat dit ’n irritasie was. Die feit dat die hemp 100 % uit katoen gemaak is, maak ’n groot verskil. ’n Ventilasiesnit met ’n gaasinvoegsel agter op die rug laat die lug deur en hou só jou lyf koel. Dit help ook dat die hemp vinnig droog word. Die skeurvrye materiaal (ripstop) sal ook verseker dat ’n doring nie noodwendig die hemp skeur soos jy deur die veld beweeg nie. Die knopies op die hemp sit lekker naby aan mekaar, wat verdere gemak teweegbring.
Ek het een oggend ’n bietjie vroeër uitgegaan en besluit om die langmouhemp aan te trek. Ek is redelik langer as die normale mens en het nog nooit regtig ’n langmouhemp gehad waarvan die moue my reg pas nie... tot daardie oggend. Die langmouhemp het perfek gesit en ek kon gemaklik vroeg die oggend met hom uitgaan. Ek het ook geweet dat dit binnekort weer lekker warm sou word en dat ek dan net die moue kan oprol en aangaan met die jag.
Beide hemde is ook lekker lank in lengte, dus steek ’n mens dit net een keer in en jy hoef nie die hele dag lank stukke wat uittrek weer in te steek nie.
Die twee sakke op die bors is net groot genoeg vir ’n klein jagverkyker of selfoon en maak
lekker stewig met ’n knoop toe. Hulle het ’n materiaal-invoeging aan die kant, sowel as onder elke sak, wat beteken hulle strek lekker breed oop en dat wat ook al jy binne-in sit, jou nie sal pla terwyl jy stap nie.
Laaste op die lys van produkte was hulle splinternuwe langbroek wat een van die dae op die rakke beskikbaar gaan wees. Reeds met die aanpas van die broek het hy lekker gemaklik gesit. Die materiaal is 50 % katoen en 50 % polikatoen, wat soortgelyk is aan die tipe materiaal wat die weermag gebruik. Met een sak agter op die boud en die twee cargo pants-tipe sakke op die bene is daar genoeg pakplek vir ’n oggend- of middagsessie in die veld. Hulle het ook hulle eie unieke aspek ingebring met ’n naat in die middel voor op die pype. Die broekspype is redelik breed, maar terselfdertyd ook nie so breed om steurend te wees nie. Dit het genoeg beweegruimte as jy tussen die bosse moet deurkruip.
Die Stevenson-Hamilton-klere het my regtig beïndruk tydens die jag en die twee hemde is nou heel bo aan my klerelys vir bykans enige geleentheid. Ek gaan beslis vir my nog aanskaf.
* Vir meer inligting oor die klere of om te hoor waar jou naaste handelaar is, kontak die vervaardiger, Promark, by 012-546-5035 of stuur ’n e-pos aan admin@ promark.co.za. Besoek gerus ook hul webtuiste by www.promark. co.za.