DAARDIE EERSTE JAG
Ek is gebore en getoë op die plaas Sewefontein in die Volksrust-distrik, halfpad tussen Volksrust en Memel, die destydse Suidoos-Transvaal. Afgesien van jakkalsjag te perd met ’n span jakkalshonde, was jag met ’n vuurwapen op die plaas taboe ná ’n noodlottige skietongeluk in 1962. My pa se langloop-Lee-Metford .303 met die geelkoperbeslag agteraan die kolf en ’n Mossberg 12-boor het stof in die kluis vergader. Agt jaar later, op twaalfjarige ouderdom, kon hierdie plaasseuntjie se smag na jag en skiet nie meer in toom gehou word nie.
My eerste kans was danksy ’n testosteroongeveg tussen twee blesbokramme, waarna die verloorder vertroosting in die buurman se groenvoer gevind het. Ter nabetragting is dit duidelik dat die buurman se argwaan die leidende beweegrede agter die skiet van my eerste bok was.
My pa het geglo die Lee-Metford skiet bont en het ná al die ongebruikte jare in die kluis ook roes in die loop. “Nee,” sê ons vriendelike buurman, “jy jaag net ’n paar skote deur hom en die roes is aangespreek.” Ons is algar agter die opstal ingebondel vir die wis en die onwis terwyl die buurman voor die opstal ses skote deur die loop gejaag het. Nou vir die bontskiet! Selfs dit was nie bo sy vuurmaakplek nie. “Jy toets hom op 25 tree op ’n mieliepit.” Vandag nog dink ek met nostalgie aan ons vriendelike buurman wat ook sy onbaatsugtige bydrae tot my eerste jag gelewer het.
Die volgende oggend agterop die Datsun-bakkie het ek Kaptein Caprivi na ’n tweederangse skaapdief laat lyk: gejagmes, geknipmes, gebandolier, tiervelhoed, stewels met my oupa se polisiekamaste. Ek was gereed vir geskiedenis maak. Die skaaptralies agterop die bakkie was
ideaal vir dooierus. Dit was ’n nekskoot van agter af op ongeveer 150 tree met ’n oop visier. Watter bydraende rol die bontskiet gespeel het, kan ek maar net raai. Nog blesbokke het gevolg, asook enkele springbokke op die Vrystaat-plaas, Kromelmboog.
Met my agtiende verjaardag was die Lee-Metford die grootste geskenk wat ek kón ontvang. Die geweer is na Musgrave net buite Bloemfontein geneem om herloop te word na ’n 6mm met ’n linkshandige kolf, synde dat die uwe links skiet. Die afgelope paar maande het ek twee maal gelees dat menige .303’s na .30-06 herboor is. Dis té lank gelede om te onthou waarom ons nie die .30-06-roete gevolg het nie. Ek het nietemin vir baie jare groot vreugde uit my verjaardaggeskenk geput.
Tans is my droom om met die volgende verjaar ’n .375 Holland & Holland, enige model sal doen, te ontvang. My vrou het die proeflees gedoen, en hierdie laaste opmerking is spesifiek op haar gemik!
COENRAAD PIETERSE
Die Lee-Enfield-aksie kan nie die langer patroon van die .30-06 of die druk wat dié kaliber ontwikkel, hanteer nie, so dis ongelukkig nie ’n haalbare ombouing nie. – Red.