Skiet ons voorblad met jou kamera en wen opwindende pryse!
SA JAGTER/HUNTER is altyd op soek na goeie foto’s vir ons voorblad. Skryf gerus in vir ons splinternuwe kompetisie waar jou foto op die voorblad kan pryk – ’n lekker prys is op die spel!
Voorbladonderwerpe hoef nie noodwendig spesies te wees wat normaalweg gejag word nie, maar foto’s van byvoorbeeld muise of slange sal nie by die tydskrif se tema inpas nie.
Die voorbladfoto wat jy instuur, moet ’n resolusie van ten minste 300 DPI hê. Dit moet in portretformaat (portrait) wees, met ’n afmeting van 23 cm x 28 cm, of ’n ratio van naastenby 4:5. Foto’s moet groter as 2 MB wees, maar kleiner as 12 MB.
Vir ’n tipiese voorbladuitleg sal die foto-onderwerp ongeveer in die middelste derde horisontaal, asook vertikaal wees. Die onderwerp moenie minder as 15% (ongeveer 1/6de van die bladsy) en nie meer as 25% van die totale foto opneem nie. Skiet dus wyd met jou kamera, moenie te naby inzoem nie en moenie die agtergrond sny (crop )as jy die foto redigeer nie. Ons het redelik spasie nodig bo, onder, links en regs om die voorbladprikkels te plaas. Die tydskrif se mashoof (naam) en uitgawenommer verskyn altyd op dieselfde plek.
Die beste voorbladfoto’s is dié met ’n vervaagde (blurred) agtergrond en wat nie te bont of besig is nie. Die dier se kop en horings kan byvoorbeeld ook alleen die onderwerpspasie vul en die lyf en bene kan buite die onderwerpspasie val, solank teks bo-oor dit leesbaar sal wees.
Foto’s wat voorheen deur enige ander tydskrif of sosialemedia-platform gepubliseer is, kan ongelukkig nie gebruik word nie – dit moet oorspronklike, nuwe materiaal wees. Foto’s wat in die verlede geneem is, is dus ook welkom mits dit nie voorheen gepubliseer was nie.
Stuur jou inskrywing aan die redakteur Francois van Emmenes by francois@sahunter.org