Smelt-in-die-mond lekker
Maak vanjaar dié anderste trifle met behulp van Rhodes Quality-produkte. Jy kan dit voor die tyd maak en vries, sodat jy dit net kan voorsit en geniet
TRIFLE-ROOMYSKOEK
Die jellie help dat die roomys nie so gou smelt wanneer jy die koek voorsit nie. genoeg vir 6-8
SPONSKOEK
• 4 eiers, geskei
• 200 g (250 ml) strooisuiker
• 70 g (125 ml) koekmeel
• 60 ml Rhodes Quality Hinds-vlapoeier
• 250 ml Rhodes Quality-appelkooskonfyt
VULSEL
• 2 x 40 g Rhodes Quality Trotters-grenadellajellie
• 410 g-blik Rhodes Quality-vrugtekelkie in stroop, gedreineer
• 2 eiers
• 3 eiergele
• 200 g (250 ml) strooisuiker
• 100 g witsjokolade, gesmelt
• 250 ml room, plus ekstra vir voorsit
• 2 x 410 g-blikke Rhodes Quality-perskeskywe, gedreineer
• 115 g-houer Rhodes Quality-grenadellamoes
Sponskoek Verhit oond tot 180 °C. Voer ’n bakplaat van 20 x 15 cm met bakpapier uit en spuit goed met kleefwerende kossproei. Plaas eiergele en derde van die strooisuiker in ’n middelslagmengbak. Klits met elektriese klitser tot dik en skuimerig. Klits eierwitte in ’n skoon bak tot sagte punte vorm. Klits res van strooisuiker geleidelik by en hou aan klits tot blink en styf. Vou met ’n metaallepel by eiergeelmengsel in. Sif meel en vlapoeier by en vou deur. Keer beslag op uitgevoerde bakplaat uit en versprei eweredig. Stip met klontjies appelkooskonfyt. Plaas in warm oond vir 10-12 minute of tot gaar. Keer uit op ’n draadrak om af te koel. Vulsel Maak jellie aan met 250 ml kookwater en laat afkoel tot kamertemperatuur. Pols gemengde vrugte in voedselverwerker tot gladde puree en voeg by afgekoelde jellie. Plaas eiers, eiergele en strooisuiker in ’n middelslagglasbak wat stewig op ’n pot sal pas. Bring so 2 cm water tot kookpunt in pot. Sit glasbak op pot, maar moenie dat bak aan water raak nie. Stel plaat op matig terwyl jy die eiers en suiker met ’n elektriese klitser klits tot dik en skuimerig, sowat 10 minute. Vou saam met witsjokolade by jelliemengsel in. Klits room tot sagte punte vorm en vou by eiermengsel in. Voer broodpan van 11 x 21 cm met kleefplastiek uit. Sny twee stroke van die sponskoek so groot soos die pan. Plaas een sponskoek met appelkooskant na onder in pan. Gooi roomysmengsel bo-op en plaas tweede stuk sponskoek met appelkooskant na bo op mengsel. Vries oornag. Keer gevriesde roomyskoek uit op dienbord. Klop ekstra room tot sagte punte vorm en skep bo-op koek.Versier met perskeskywe en grenadellapulp. Sit voor.