My mond wáter!
Perskes se geur en smaak is so soet soos my herinneringe aan dié lekkerte.
Ek dink aan SONRYP PERSKES sommer so van die boom af eet. Gekook tot ’n blink konfyt of opgesny met ’n bietjie kaneel, bruinsuiker en ’n drukkie suurlemoen. Ek sien nog die inlêflesse vol goudgeel wat op my ouma se SPENSRAK wag om met ’n skep vanieljeroomys geniet te word.
Perskes is vir my altyd reg, enige plek, enige tyd. Net ’n blik perskes met ingedampte melk is vir my al bederf.
Maar perskes is meer as bederf; dit was nog altyd koningskos, sê die kenners. Sedert die vroegste tye in China is die perske deur die koninklikes verhef tot elite-vrug, en ook in Persië (vandag se Iran) was die EKSOTIESE VRUG met sy meer as 80 geurkomponente hoogs gesog. Die “Persiese appel” is deur die eeue deur reisigers, veroweraars en avonturiers die wêreld ingedra. Jan van Riebeeck het glo perskes vanaf St. Helena hier aan die Kaap laat aanplant, en teen 1887 het SA perskes reeds hul koninklike buiging gemaak toe hulle na Engeland verskeep is vir koningin Victoria se goue jubileum.
In baie kulture is die perske ’n simbool van geluk. Vir seker ’n bron van inspirasie. Dis al dikwels geskilder, ook deur die grotes soos Claude Monet, Renoir en Van Gogh. (Selfs ék het die perske leer teken tydens ’n besoek aan SA kunstenaar Louis Jansen van Vuuren se La Creuzette op die Franse platteland!) Vandag spog kinders, popsterre, boetieks en restaurante met Peaches as naam, en duur PARFUUMS, WYN en SJAMPANJE dra die geurnote. En die perske-melba? Die perske is juis gekies vir ’n spesiale NAGEREG om hulde te bring aan die wêreldsopraan Nellie Melba. Maar net so lekker sing ons Anton Goosen: “As die geelperskereën veertien dae in die boorde val, en dit reën bietjie-bietjie en dit reën bietjie-bietjie.”
Wie onthou oud-Beatle Ringo Starr se groot tagtigstreffer, “You’re Sixteen”? Daardie openingswoorde: You come on like a dream, peaches and cream … Maar wag, dis net hier dat ek die fles perskes in my kombuiskas oopmaak. GOUDGEEL STROPERIGE PERSKES met vars plaasroom. Sommer vir die onthou …
Geniet Barbara se perske-inspirasie (bl. 70) en hierdie hele someruitgawe saam met my.