HAMKROKET (JAMÓN CROQUETAS) (bl. 26)
GENOEG VIR 40 KROKETTE
• 500 ML VOLROOMMELK • SOUT EN VARSGEMAALDE
SWARTPEPER • LOURIERBLAAR • TAKKIE VARS TIEMIE • 2 KNOFFELHUISIES, PLATGEDRUK • 125 G GAAR EISBEIN (GEROOKTE
VARKSKENKEL) • 4 TEELEPELS (20 ML) OLYFOLIE • 80 G (85 ML) ONGESOUTE BOTTER • 70 G (125 ML) KOEKMEEL, GESIF • 25 G GERASPERDE PARMESAANKAAS • 25 G DRAGONMOSTERD • 4 EIERS • 100 G WITBROODKRUMMELS • SONNEBLOMOLIE VIR DIEPBRAAI
Gooi melk in ’n swaarboomkastrol. Geur met sout en peper, lourierblaar, tiemie en knoffel. Bring tot kookpunt oor lae hitte. Haal af van hitte sodra dit begin kook. Laat staan 30 minute. Gooi melk deur ’n sif en gooi kruie en knoffel weg. Sny ham van been en verwyder alle vet. Sny in klein blokkies. Verhit olyfolie en botter in ’n swaarboomkastrol. Voeg ham by en braai 2 – 3 minute. Voeg meel by en roer met ’n houtlepel tot gladde pasta vorm. Laat kook 3 minute terwyl jy heeltyd roer. Voeg melk geleidelik by en roer deurentyd. Laat kook 10 minute om gladde sous te maak terwyl jy steeds bly roer. Voeg kaas en mosterd by en roer tot kaas gesmelt het. Geur weer met sout en peper indien nodig. Gooi mengsel in ’n diep bakplaat en laat afkoel. Maak toe met kleefplastiek en plaas oornag in yskas. Klits eiers in ’n bakkie en geur met sout en peper. Gooi broodkrummels in ’n ander bakkie en geur met sout en peper. Haal hammengsel uit yskas. Verhit twee eetlepels. Skep ’n eetlepel vol hammengsel uit en gebruik twee eetlepels saam om ’n quenelle of ovaalvormige bal te vorm. Plaas op ’n bakplaat wat uitgevoer is met kleefplastiek. Herhaal tot hammengsel op is. Plaas quenelles in vrieskas tot ferm. Doop in gegeurde eier en rol dan in broodkrummels. Verhit olie tot 180 °C. Braai 4 – 5 quenelles op ’n slag vir 2 – 3 minute tot bros en goudbruin. Geur met sout en peper en hou gaar krokette eenkant warm terwyl jy res van quenelles braai.