PERSKEKONFYT MET WARMMELK-SPONSKOEK
(bl. 75) Dis baie bevredigend om jou eie konfyt te kook. Skep dit dan saam met room op ’n paar lae sponskoek en jou mense sal dink jy is ’n groot ster.
GENOEG VIR 1 BOTTEL VAN SOWAT 500 ML
KONFYT • 660 G ONTPITTE GEELPERSKES ( cling peaches) • 660 G (825 ML) SUIKER • 250 ML WATER
Sny perskes oop en skep pitte uit met ’n teelepel. Behou skil. Sny in stukkies en weeg 660 g daarvan af. Plaas perskes, suiker en water in ’n groot kastrol. Meng goed deur. Plaas op matige hitte op stoofplaat. Bring tot kookpunt terwyl jy roer. Die suiker moet opgelos wees voor die konfyt begin kook. Kook oop vir sowat 1 uur. Roer elke nou en dan. Plaas ’n bordjie vir 15 minute in die yskas. Skep ’n bietjie warm konfyt op die bordjie. Laat staan 5 minute. Druk konfyt met jou vinger – as plooitjies bo-op vorm, is dit reg. Gooi warm konfyt in gesteriliseerde bottel.
WARMMELK-SPONSKOEK • 10 EIERS • 500 G (595 ML) STROOISUIKER • 600 G (1 070 ML) KOEKMEEL • 1 ML SOUT • 15 ML BAKPOEIER • 500 ML MELK • 200 G (220 ML) BOTTER • 5 ML VANIELJEGEURSEL
Plaas oondrak in middel van oond. Verhit oond tot 180 °C. Voer bodem van 3 standaard-losboomkoekpanne van 23 cm in deursnee uit met bakpapier. Spuit panne goed met kleefwerende kossproei. Breek eiers in mengbak van elektriese menger. Klits sowat 1 minuut. Voeg suiker bietjiesgewys by en klits tot lig en romerig. Hou eenkant. Sif meel, sout en bakpoeier saam in ’n ander mengbak. Hou eenkant. Gooi melk in ’n kastrol en voeg botter en geursel by. Verhit tot botter gesmelt het, maar sorg dat die melk nie kook nie. Gebruik ’n groot lepel en vou die meelmengsel om die beurt met die melkmengsel in die eiers in, met ander woorde eers ’n bietjie meelmengsel, dan ’n bietjie melkmengsel, ensovoorts, tot alles gebruik is. Verdeel koekbeslag tussen uitgevoerde panne en plaas in oond. Bak 25 – 30 minute. Druk ’n dun toetspennetjie in die middel van die koeklae. As dit droog uitkom, is die koek gaar. Haal uit en keer versigtig uit op afkoelrakke. Laat heeltemal afkoel voor jy die koek versier.
• 500 ML ROOM • PERSKEKONFYT • VERSIERSUIKER OM OOR TE SIF
Klits room styf. Smeer ’n dik laag van die konfyt op een van die koeklae. Skep styfgeklitste room bo-op en smeer plat. Plaas nog ’n koeklaag bo-op. Smeer nog ’n laag konfyt en skep res van room bo-op. Smeer die room plat. Plaas die laaste koeklaag bo-op en sif versiersuiker oor.