Tapas vir jou tafel
Sedert Liam Tomlin in 2004 na Suid-Afrika gekom het, het hy een van die bekendste name op die kostoneel geword. As leermeester het hy al talle mense leer kook en as topsjef swaai hy self die septer in sy Kaapse restaurant. Hy deel ’n paar resepte uit sy nuutste resepteboek met ons
As veertienjarige is hy uit sy priesterskool in Ierland geskors, want hy was “’n stout outjie”. Hy het as potskraper in ’n restaurant begin werk en ses maande later ’n vakleerlingskap in die kombuis gekry. Aanvanklik was kosmaak vir Liam Tomlin net nog ’n werk. Toe gaan maak hy ’n draai in Switserland, waar hy besef het hy wil ’n professionele sjef word en klaar.
Hy het ondervinding in toprestaurante in Europa en Australië opgedoen voordat hy die bekende Banc-restaurant in Sydney begin het. Talle toekennings het gevolg, onder meer restaurant van die jaar by verskeie geleenthede.
Vandag is hy die sjef en eienaar van Chefs Warehouse & Canteen in Kaapstad. Vir hom gaan kosmaak oor die hele proses, van die aankoop van die bestanddele tot die bereiding van die geregte. En om uiteindelik aan te sit en die eindproduk met oorgawe te geniet in ’n ontspanne afmosfeer.
“Ek maak nie meer ingewikkelde kos met bestanddele wat sommer net bygevoeg word nie. Ek fokus op tegniek en geur om smaaklike en goed gebalanseerde geregte te skep.
“By Canteen het ons tapas – happies in klein bakkies – uit verskillende wêrelddele op die spyskaart: Asië, die Midde-Ooste en Europa.”
Tapas is ook die titel van Liam se vierde boek. Dis ’n illustrasie van die soort kos wat hy graag kook en hoe hy graag eet, met baie verskillende smake, teksture en kookstyle. Die boek bevat 350 resepte. – Die SARIE KOS-span