diéwinkelgoed
’N DING WAT SPRING
Op byna elke spyskaart kry jy deesdae springmielies in die een of ander vorm. Nou’s dit ook beskikbaar in geure soos parmesaan, truffel en selfs vanielje. Skiet jou eie met Imbo se sakkies mielies wat landwyd te koop is teen R10,69 vir 500 g.
BOKS VOL SJOKOLADE
Die lewe is soos ’n boks vol sjokolade, het Forrest Gump gesê. En as dit soos Lindt se nuwe mini-praliens smaak, kan dit net lekker wees. Die boks van 20 handgemaakte sjokolades kos R85,99 vir 100 g by uitsoek-winkels.
VARS UIT ’N BLIK
Bly jy ver van die see? Danksy Mayfair se ingemaakte steurgarnale kan jy ook saamsmul aan dié soutwater-juwele. Dreineer en gebruik soos nodig (dis reeds gaar). Sowat R55 vir 200 g.
AMERIKAANSE MOSTERD
Sit ’n titsie mosterd op ’n worsrol of hamburger vir ekstra smaak. Probeer Colman’s se nuwe Amerikaanse mosterd – dis soeter as Franse mosterd en brand minder. Sowat R21 vir 167 g.
SÊ KAAS
As jy van lekker sterk kaas hou, is Lancewood se verouderde cheddarkaas beslis die proe werd. Dit word 6 maande lank verouder en het die kenmerkende bros tekstuur van sulke kaas. Koop dit by die naaste supermark teen R36 vir 300 g.
VINNIGE BEDERF
Maak binne 25 minute vir jou kinders vars sjokolademuffins met Sasko se hulp. Jy koop die basiese mengsel in ’n pakkie en voeg net olie, melk en eiers by. Sowat R14 vir ’n 500 g-sakkie.
TOERITS-BROODJIES
Kikker jou werkdag op met toebroodjies wat jy vars hou in Glad se herseëlbare toeritssakkies. Daar’s 20 sakkies in ’n pak (R19 by supermarkte) en dis groot genoeg vir ’n standaardtoebroodjie.
GESONDE SALAMI
Almal probeer gesonder leef en daarom het Enterprise ’n reeks koue vleise bekend gestel wat minder vet bevat. Ons hou veral van die salami – so smaakvol dat jy nie eens die ekstra vet mis nie. Landwyd te koop teen R34,99 vir 100 g.
ONTHAAL IN STYL
Hou jy van fênsie kos kook? Dan moet jy Sea Harvest se bevrore tuna-steaks onder die Fine Dine-handelsmerk met jou volgende onthaal probeer. Onthou om dit oornag in die yskas te ontdooi. Dit kos sowat R54,99 vir 200 g by uitsoek-supermarkte.
EKSOTIESE OLIE
Asof die olie van avokado’s nie al gesond genoeg is nie, maak Westfalia dit nou met ’n suurlemoengeur. Vanweë die olie se hoër rookpunt kan jy dit gebruik om kos te braai of vir warm slaaisouse. Landwyd te koop teen R33,99 vir 250 ml.
SONDER SUIKER
Vir mense wat suiker vermy, is Canderel se reeks donkersjokolade-produkte goeie nuus. Dit bevat al die smaak van sjokolade sonder dat ekstra suiker bygevoeg is. Sowat R28 vir ’n 100 g-plak.
GROENVYE
Rek jou somerkuiers met ’n kaasbord ná ete en rond dit af met heel groenvye. All Gold se glashouers met ingemaakte groenvye is herseëlbaar en kan net so op tafel gesit word. Landwyd te koop teen R47,99 vir 320 g.
MAAK SKOON
Speel vinnig klaar met gemors in die kombuis met Handy Andy se cream. Met die veelsydige skoonmaakmiddel maak jy alles van aangebrande potte tot werkoppervlakke maklik skoon. Landwyd te koop teen R15,69 vir ’n 500 ml-bottel.
SMEERBOTTER
Niks is so lekker soos botter op vars brood nie, en Ladismith maak dit maklik met ’n nuwe soort smeerbotter. Dis verpak in herseëlbare bakkies en word gemaak van regte botter. Sowat R40 vir 500 g.
GEURIG
Wie wil nou die moeite doen om botter te geur as jy Parmalat se botterworse vol kruie en knoffel by die supermark kan koop? Gebruik die botter om groente te roerbraai of sit dit voor met warm brood. Sowat R22 vir ’n 150 g-wors.
GOEIE KOFFIE
Kitskoffie van Nescafé proe net so lekker soos die beste filtreerproduk. Alta Rica is ’n ekstra-sterk koffie met geure van vanielje en neut. Dit kom oorspronklik uit Suid-Amerika. Sowat R86 vir 100 g.
EET NOG EEN
Die Skotte is bekend vir mans in rokkies en brosbroodkoekies ( shortbread). Moir’s se Munch-a-Lot gaan jou laat voel of jy die koekies in die hart van Skotland eet. Die boksies van 175 g elk kos R10,99 by supermarkte landwyd.
NOG EEN SNY
Die lae-GI-brood van Albany is vol ekstra energie wat jou deur die dag sal help. Dis reeds gesny vir jou gerief, en verpak in ’n sak met ’n spesiale plastiekknip waarmee jy dit kan herseël sodat die brood langer vars bly. Sowat R14,49 vir 700 g.