SAGOPOEDING MET AARBEIKONFYT
(bl. 21) Dis seker een van die gewildste poedings in ons land. Pleks van die tradisionele appelkooskonfyt gebruik ek aarbeikonfyt.
GENOEG VIR 6 – 8
• 140 G SAGO
• 750 ML MELK
• 100 G (125 ML) SUIKER
• KNIPPIE SOUT
• 25 ML (30 G) BOTTER
• 2 EIERGELE, GEKLITS
• 90 ML AARBEIKONFYT
• 4 EIERWITTE
• 100 G (120 ML) STROOISUIKER
• VARS VYE
Verhit oond tot 180 °C. Gooi sago in sif en spoel af met koue water. Gooi melk in ’n kastrol en voeg sago by. Verhit oor lae hitte en laat prut tot sago deurskynend is. Roer nou en dan. Voeg die 100 g suiker, sout en botter by. Meng goed. Voeg die geklitste eiergele by en meng goed. Skep mengsel in twee ronde oondbakke met ’n deursnee van sowat 12 cm. Stip aarbeikonfyt bo-op. Klits eierwitte styf en voeg die 100 g strooisuiker lepel vir lepel by. Klits tot stywe meringue vorm. Skep meringue op die sagomengsel en plaas in oond. Bak 20 – 25 minute. Sit warm voor met vars vye.