KLAPPERBROOD- POEDING
(bl. 20) Die anysgeur in die mosbolletjies maak die broodpoeding besonder lekker. Koop mosbolletjies by ’n bakkery, of vervang dit met witbrood of selfs croissants.
GENOEG VIR 4 – 6
• 6 EIERS
• 200 G (240 ML) STROOISUIKER
• 250 ML ROOM
• 1 X 400 ML-BLIK KLAPPERROOM
• 16 DUBBELE MOSBOLLETJIES
• VARS KLAPPERSTUKKE
Verhit oond tot 180 °C. Breek eiers in mengbak van elektriese menger. Klits en voeg suiker bietjiesgewys by. Klits verder tot lig en romerig. Verhit room tot net voor kookpunt in ’n groot kastrol. Haal kastrol af van hitte en voeg geklitste eiermengsel by. Roer goed en plaas terug op lae hitte. Voeg klapperroom by en hou aan roer met houtlepel tot vla verdik het. Die vla moet die agterkant van die houtlepel goed bedek. Haal kastrol af van hitte en hou eenkant. Smeer ’n oondbak van sowat 25 x 20 cm en 5 cm diep met botter. Sny mosbolletjies soos brood op in snye en pak styf langs mekaar in bak. Gooi vla oor mosbolletjies en plaas bak in oond. Bak sowat 35 minute tot vla gestol het en poeding mooi bruin is bo-op. Gebruik ’n groenteskiller en maak skaafsels van die vars klapperstukke. Haal poeding uit oond en rangskik skaafsels bo-op. Sit warm voor.