KERSIEGEBAK (CLAFOUTIS)
(bl. 25) Hierdie tradisionele Franse nagereg word gewoonlik met vars kersies gemaak. Ek gebruik geblikte kersies en dit werk net so goed.
GENOEG VIR 4 – 6
• 400 ML ROOM • 5 ML VANIELJEGEURSEL • 200 ML MELK • 6 EIERS • 100 G (120 ML) STROOISUIKER • 140 G (250 ML) KOEKMEEL • 2 X 425 G-BLIKKE ONTPITTE SWART KERSIES, GEDREINEER • VERSIERSUIKER OM BO-OP TE SIF • BEVRORE KERSIES VIR GARNERING
Verhit oond tot 180 °C. Verhit room en vanieljegeursel saam in ’n kastrol tot net voor kookpunt. Haal af van hitte en voeg melk by. Laat afkoel. Klits eiers, suiker en meel saam tot lig en romerig. Voeg roommengsel by en meng goed. Voeg kersies by en meng goed deur. Spuit ’n koekpan van 15 cm in deursnee en 7 cm diep met kleefwerende kossproei. Gooi beslag in pan en plaas in groot oondbak. Gooi kookwater in oondbak tot halfpad teen koekpan se wand op. Plaas in oond en bak 45 minute. Haal versigtig uit en keer uit op opdienbord. Sif bietjie versiersuiker bo-op en garneer met bevrore kersies.