Steurgarnaal-en-mosselsop met gebraaide Spaanse wors

Dis nou ’n seefees in een pot. Sit dit voor met lekker tuisgebakte brood. Sien bl. 46 vir stap-vir-stap-broodresepte.

GENOEG VIR 4 – 6

• 40 ML OLYFOLIE • 1 UI, FYNGEKAP • 3 KNOFFELHUISIES, FYNGEKAP • 2 X 400 G-BLIKKE GEKAPTE TAMATIES • 500 ML WITWYN • SOUT EN VARSGEMAALDE SWARTPEPER • 40 HALFSKULP-MOSSELS • 16 – 20 STEURGARNALE, SKOONGEMAAK MAAR STEEDS IN DOP • 40 ML FYNGEKAPTE PIETERSIELIE • 30 ML OLYFOLIE • 250 G SPAANSE WORSE (CHORIZO), IN SKYWE GESNY • 30 ML FYNGEKAPTE PIETERSIELIE

Verhit die 40 ml olyfolie in groot diep kastrol en braai ui en knoffel tot sag en deurskynend. Voeg tamaties by en maak kastrol toe met ’n deksel. Laat kook 10 minute. Voeg wyn by en geur met sout en peper. Laat prut 20 minute sonder deksel. Voeg mossels en steurgarnale by en sit deksel weer op. Laat kook sowat 10 minute tot steurgarnale en mossels gaar is. Verhit die 30 ml olyfolie in ’n pan. Braai Spaanse wors sowat 5 minute en voeg by sop. Sprinkel pietersielie oor en sit voor.