Aartappel-en-aspersiesop met varkvleis-frikkadelle
(bl. 61) Die geur van die aspersies in die sop en die vleiserigheid van die maklike frikkadelle sorg vir ’n besonder lekker smaak.
GENOEG VIR 4
• 40 ML OLYFOLIE • 1 UI, FYNGEKAP • 2 KNOFFELHUISIES, FYNGEKAP • 400 G VARS GROEN ASPERSIES • 6 MIDDELSLAG-AARTAPPELS, GESKIL EN IN BLOKKE GESNY • 1 LITER HOENDERAFTREKSEL • SOUT EN VARSGEMAALDE SWARTPEPER • 8 VARKWORSIES • 60 ML OLYFOLIE • 25 G (30 ML) BOTTER • 250 G CRÈME FRAÎCHE (SUURROOM)
Verhit oond tot 180 °C. Verhit olyfolie in diep kastrol en braai ui en knoffel tot sag en deurskynend. Hou 100 g van aspersies eenkant. Halveer res van aspersies en voeg by mengsel in kastrol. Voeg aartappels en hoenderaftreksel by. Geur met sout en peper en maak kastrol toe met deksel. Laat prut 30 – 45 minute tot sag. Druk vleis uit worsies en vorm twee frikkadelle van elke worsie. Sprinkel helfte van die 60 ml olyfolie op ’n bakplaat en plaas frikkadelle bo-op. Sprinkel res van olyfolie oor frikkadelle en plaas in oond. Oondbak sowat 20 minute en draai dan frikkadelle om. Oondbak nog 15 minute en haal uit. Wanneer groente in sop sag is, skep helfte in voedselverwerker en verpulp. Hou puree eenkant en verpulp ander helfte van sop. Skep alles terug in pot en verhit tot net voor kookpunt. Smelt botter in pan en braai die 100 g aspersies wat jy eenkant gehou het sowat 3 minute. Geur met sout en peper. Skep frikkadelle in sop en garneer met gebraaide aspersies. Sit voor met crème fraîche.