KOOL MET ROOMSOUS
(bl. 82) ’ n Sondagtafel werk nie sonder blomkool en witsous nie. Ek gebruik kool pleks van blomkool met ’n roomsous.
GENOEG VIR 6 – 8
• 45 ML OLYFOLIE • 1 X 250 G-PAKKIE BLOKKIESPEK • 2 KNOFFELHUISIES, FYNGEKAP • 500 ML ROOM • 12 BABA-KOOLKOPPE (SAVOJEKOOL), GEHALVEER • 100 G PARMESAANKAAS, GERASPER • SOUT EN VARSGEMAALDE SWARTPEPER • 10 ML NEUTMUSKAAT
Verhit olyfolie in groot pot tot warm. Voeg spek by en roerbraai 5 – 8 minute of tot goudbruin en lekker bros. Dis die brosheid wat die sous die lekkerste smaak gee. Voeg knoffel by en braai nog 1 minuut. Voeg room by en bring tot kookpunt. Verlaag hitte en laat stadig prut tot room met helfte verminder het – 8 – 10 minute. Terwyl room afkook, bring pot met sowat 3 cm water in tot kookpunt. Pak kool in water en plaas deksel op pot. Kook 5 – 8 minute of tot kool gaar maar steeds ferm is. Verpulp roomsous met staafmenger ( stick blender) tot glad. Voeg kaas by. Geur goed met sout en peper. Pak warm kool op opdienbord en gooi roomsous oor. Sprinkel neut oor en sit voor.