BLOMKOOLSLAAI
(bl. 89) Het jy al ooit blomkool in die oond gerooster? Maklik en lekker.
GENOEG VIR 4
• 500 G BLOMKOOLSTUKKE • 45 ML KANOLA-OLIE • 30 ML HEEL KOMYNSAAD • SOUT EN VARSGEMAALDE SWARTPEPER • 50 ML OLYFOLIE • 45 ML SJERRIEASYN • 30 ML KORRELMOSTERD • 45 ML HEUNING • 1 BRANDRISSIE, BAIE FYN GEKAP • 50 G ROSYNTJIES • 100 G GEVLOKTE AMANDELS • 1 X 80 G-SAK BABA-SPINASIE • 140 G SUIKERERTJIES ( sugar snaps)
Verhit oond tot 180 °C. Plaas blomkool in oondbraaibak en sprinkel kanola-olie, komyn, sout en peper oor. Oondbraai 15 – 20 minute oop of tot blomkool goudbruin en gaar is. Terwyl blomkool in oond is, meng olyfolie, asyn, mosterd, heuning en brandrissie saam met draadklitser om marinade te maak. Plaas warm blomkool, rosyntjies, amandels, spinasie en suikerertjies in groot slaaibak. Skep marinade oor en meng deur met twee groot opskeplepels tot alles met sous bedek is. Sit voor.
MARIZA SE WENK DIE VETINHOUD VAN DIE SLAAIE IS DALK EFFE HOOG, MAAR DIT KOM VAN GOEIE BRONNE SOOS NEUTE EN KANOLA-OLIE WAT BEWESE VOORDELE INHOU VIR DIABETE WANNEER DIT VERSADIGDE EN VERHARDE VETTE IN DIE DIEET VERVANG. BOONOP VOORSIEN DIT BELANGRIKE VETOPLOSBARE VOEDINGSTOWWE SOOS VITAMIEN E, ASOOK OMEGA 3.