OP DIE TONG
’n Bier met ‘n goeie hopen-moutbalans is die beste pasmaat vir dié ryk gereg. Die bietjie bitterheid van die hop sny as ’t ware deur die ryk smake van die kaas, terwyl die mout die kaas se southeid aanvul. Devil’s Peak APA lei met ‘n prominente hopstyl, met ‘n ligte mout-teenwoordigheid en lae bitterheid.
Kies tussen ‘n mout-gedrewe bier soos English Ale, wat goed saam met die paprika in die gereg sal werk, of ‘n appel-gedrewe sider, soos Everson’s Single Varietal Cider. Dit boots die tradisionele varken-appel-kombinasie na, met die sider se suurheid wat die vetterigheid in die gereg help neutraliseer.
Gebruik ‘n Amber Ale of selfs ‘n donker stout-bier om die sampioenreduksie te maak. Die mout in die biere sal die umami-effek van die gekaramelliseerde sampioene en uie bevorder. Skink egter die CBC Pilsner om saam met die filet te geniet: die bier se moutbasis en hopbitterheid balanseer die gereg se romerigheid.
‘n Tradisionele Weissbier, veral een met prominente piesangaromas, sal die soet geure van die vla aanvul. Soek jy egter ‘n bietjie van ‘n kontras, moet jy die Belgiese vrugtebier Liefmans Fruitesse probeer. Dit het ‘n lieflike suur wat deur die room van die vla en die vetterigheid van die doughnuts sny.