PEER-ENAMANDELTERTJIES
Peer en amandel is nou maar eenmaal goeie maats, ook in hierdie heerlike, ligte tertjie.
GENOEG VIR 4 X 10 CM-TERTJIES
DEEG • 75 G (80 ML) SAGTE BOTTER • 50 G (95 ML) GESIFTE VERSIERSUIKER • 20 G FYN AMANDELS • ½ VANIELJEPEUL SE SAADJIES • 1 EIER • 125 G (220 ML) KOEKMEEL
VULSEL • 100 G (120 ML) STROOISUIKER • 150 G (165 ML) SAGTE BOTTER • 100 G FYN AMANDELS • 2 EIERS • ½ VANIELJEPEUL SE SAADJIES • 1 X 410 G-BLIK HALWE PERE, GEDREINEER
EN FYNGEKAP
VANIELJEROOM • 250 ML ROOM • 60 G (70 ML) STROOISUIKER • 1 VANIELJEPEUL, SAADJIES VERWYDER
1 Verhit oond tot 180 °C. Klits botter, versiersuiker, amandels en vanieljesaadjies met ’n mengspaan ( K-beater) saam in ’n elektriese menger se bak. Voeg eier by en meng goed. Voeg meel by en meng tot ’n sagte deeg vorm. Skep deeg uit op kleefplastiek en vou toe. Plaas in yskas vir minstens 1 uur. Rol deeg dun uit op ’n meelbestrooide werkvlak. Voer 4 losboompannetjies van 10 cm uit en sny deeg wat oorhang af. Plaas ’n stuk waspapier bo-op en vul met droë boontjies. Plaas in oond en bak 10 minute. Verwyder boontjies en plaas kors terug in oond vir nog 5 minute. 2 Plaas bestanddele vir vulsel buiten die pere in ’n elektriese menger se bak. Klits by hoë spoed goed saam tot ’n sagte mengsel vorm. Skep in spuitsak en laat rus 30 minute in yskas. Spuit ’n lagie vulsel in bodem van pannetjie. 3 Skep ’n lagie pere bo-op. 4 Spuit ’n tweede lagie vulsel op pere. Plaas in oond en bak 15 – 20 minute tot goudbruin. Laat afkoel en verwyder uit pannetjie. Klits room, suiker en vanielje styf om vanieljeroom te maak. Sit voor saam met tertjies.