Kobus Wiese
As Springbokslot het hy ’ n bars gespeel in die Suid-Afrikaanse Wêreldbeker-rugbywenspan van 1995. Daarna het sy liefde vir ’ n sterk koppie boeretroos sy loopbaan geword, en sedertdien besit hy en sy vrou, Belinda, die onderneming Wiese Coffee Holdings, met 80 koffiewinkels landwyd en in Namibië. Kobus se goue reël is: ‘ Die lewe is te kort vir ’n swak koppie koffie óf bottel rooiwyn.’ WAT WAS EERSTE, JOU LIEFDE VIR KOFFIE OF VIR RUGBY? Ek het op Lüderitz en Oranjemund in Namibië grootgeword en leer rugby speel op die soutpanne buite die dorp. In die onder-9-spannetjie was ek vleuel. Later is ek na slot geskuif. Daar het ek gebly.
Ek “skuld” rugby. Dis ’n wonderlike sport wat my vriende regoor die wêreld laat maak het, my waardevolle lesse geleer en ook die waarde van spansport gewys het … Frik du Preez het altyd gesê ’n swak rugbywedstryd is steeds beter as ’n goeie dag op kantoor.
My liefde vir koffie kom van my rugbydae in Padua, Noord-italië, waar ek as student klubrugby gespeel het. Ek het gereeld op Venesië se bekende San Marco-plein gaan koffie drink. Maar ek het eers régtig goeie koffie begin waardeer toe ek en Belinda in 1998 met ons eie koffieonderneming begin het. By Wiese Coffee Holdings gebruik ons net Arabica-bone van Suid-amerika en Afrika en ons rooster ons eie mengsel. HOE IS JY NOG BETROKKE BY RUGBY? Ek probeer my ervaring deel deur sportkommentaar op TVrugbywedstryde te lewer. WATTER LAND SE KOS EN WYN WAS VIR JOU DIE LEKKERSTE OP JOU RUGBYREISE? Die Italianers se pasta, risotto, pizzas met die dun basis en die verskeidenheid kase was net ongelooflik! HOE MOET ’N LEKKER KOPPIE KOFFIE SMAAK? Dit is soos whisky en rooiwyn, ’n baie persoonlike ding. Ek geniet ’n “vol” koffie met skop, ander verkies matige koffie soos Mocha Java. Onthou net, as jy nie egte koffie drink nie, los dit liewer … WAT BRAAI JY GRAAG? ’n Lamstjoppie, lekker varktjoppie en roosterkoek is die beste. Skink ’n glasie goeie Cabernet, Bordeaux-versnit of Pinotage en geniet dit. Sluit gerus die ete af met melktert – my ma s’n is hemels! – en een van ons koffies.