WITSJOKOLADE-ENFRAMBOOSKONFYTKOEK
GENOEG VIR 16 KLEIN KOEKIES
• 3 EIERS • 1 X 820 G-BOKS VANIELJE-KOEKMENGSEL
(SOOS NOMU) • 1 VANIELJEPEUL SE SAADJIES • 250 ML MELK • 160 G (175 ML) BOTTER • 2 X 130 G-BOTTEL FRAMBOOSKONFYT
VERSIERSEL • 300 G WITSJOKOLADE, FYNGEKAP • 200 ML ROOM
1 Verhit oond tot 180 °C. Voer 4 rolkoekpanne van 35 x 27 cm uit met bakpapier en spuit goed met kleefwerende kossproei. Klits eiers, suiker uit koekmengselboks en vanieljesaadjies saam tot lig en romerig in ’n elektriese menger se bak. Verhit melk en botter saam tot botter gesmelt het. Voeg melkmengsel bietjies-bietjies by eiermengsel terwyl menger stadig loop. Voeg die meelmengsel uit boks by en klits by lae spoed tot ’n gladde deeg vorm. Verdeel tussen 4 voorbereide panne. Bak 10 – 12 minute of tot ’n toetspennetjie skoon uitkom. Laat afkoel. Sny koeke in breedte middeldeur. 2 Smeer dun lagie konfyt eweredig oor elke laag. Plaas 4 helftes op mekaar om ’n vierlaag-koek te vorm. Herhaal proses met ander 4 halwe lae. Bedek 2 vierlaagkoeke goed met kleefplastiek en laat oornag in vrieskas. 3 Verdeel elke gevriesde koek in 8 gelyke blokke en laat ontdooi by kamertemperatuur. 4 Maak intussen die versiersel. Smelt die witsjokolade en room saam in ’n klein kastrol oor lae hitte tot ’n gladde mengsel vorm. Laat afkoel terwyl koek ontdooi. Plaas afkoelrak met koekblokke eweredig versprei op ’n bakplaat. Gooi versiersel oor die blokke sodat dit alkant bedek is. Gooi versiersel op bakplaat terug in kastrol en gooi ’n tweede laag versiersel oor.