30 pasteie vir voor die TV
Jou mense sal die groot rugby nog meer waardeer met hierdie smaaklike pasteitjies
1BOBOTIE PASTEI
GENOEG VIR 2 GROOT PASTEIE Verhit oond tot 180 °C. Week 2 snye witbrood 10 minute in 125 ml water. Druk vloeistof uit brood en plaas in mengbak. Verhit sowat 40 ml olyfolie in ’n pan en braai 2 gekapte uie tot sag en deurskynend. Voeg 5 ml borrie, 15 ml kerriepoeier en 15 ml fyn appelkooskonfyt by. Meng goed. Laat mengsel afkoel. Voeg 500 g maalvleis by brood en meng. Voeg uiemengsel by en geur met sout en varsgemaalde swartpeper. Meng goed en skep in oondbak van 26 x 7 cm. Bak so 45 minute tot gaar. Laat afkoel. Sny bobotie in 2 groot blokke. Vou bobotiestukke toe in 2 x 400 g-velle blaardeeg. Verf met 1 geklitste eier en plaas lourierblare boop. Plaas op uitgevoerde bakplaat. Bak 30 – 35 minute.
2SPRINGBOKWILDS PASTEI
GENOEG VIR 4 PASTEIE Sny been uit sowat 500 g springbokvleis en sny in groot stukke. Verhit 20 ml olyfolie in ’n groot kastrol en braai 1 gekapte ui en 100 g blokkies strepiespek so 8 minute. Voeg vleis by en braai nog 10 minute. Voeg 20 ml bruin asyn, sout en varsgemaalde swartpeper, 1 lourierblaar en 250 ml water by. Maak kastrol toe met deksel en laat so 4 uur stadig prut. Maak vleis los met vurk en laat afkoel. Verhit oond tot 180 °C. Spuit 4 holtes van groot muffinpan met kleefwerende kossproei. Voer uit met 1 x 400 g-vel blaardeeg. Skep vulsel in en sny 4 doppies uit nog ’n vel blaardeeg. Plaas op vulsel en verf met 1 geklitste eier. Sny ’n springbokkop uit res van deeg
en plaas bo-op. Verf met geklitste eier en bak 30 – 35 minute.
3 SPEK-AARTAPPEL- EN-KAASPASTEI
GENOEG VIR 1 GROOT PASTEI Verhit oond tot 180 °C. Skil 4 gaar aartappels en sny in skywe. Verhit sowat 30 ml olyfolie en braai 4 repies strepiespek (in blokkies gesny) tot bros. Skep uit en dreineer op kombuispapier. Sny 1 groot sirkel uit 1 x 400 g-vel blaardeeg. Pak 1 laag aartappels bo-op, maar hou ’n rand van sowat 3 cm oop. Smeer bietjie van 125 g crème fraîche bo-op en sprinkel bietjie van 100 g gerasperde cheddarkaas bo-op. Geur met sout en varsgemaalde swartpeper. Herhaal lae met res van bestanddele. Sny ’n groter sirkel uit nog ’n vel blaardeeg en plaas bo-op. Druk rand stewig vas. Plaas op uitgevoerde bakplaat en verf met 1 geklitste eier. Versier bo-op met oorskietdeeg en plaas in oond. Bak 30 – 45 minute.
4 SPINASIE-EN- FETAKAASPASTEI
GENOEG VIR 4 PASTEIE Verhit oond tot 180 °C. Dompel 200 g baba-spinasieblare in kookwater en laat staan tot verwelk. Dreineer in vergiettes en druk oortollige vloeistof uit. Kap spinasie fyn. Verhit 30 ml olyfolie in ’n pan en braai halwe gekapte ui en 2 knoffelhuisies tot ui sag en deurskynend is. Voeg spinasie by en braai sowat 5 minute. Laat afkoel en krummel 3 wiele fetakaas by. Meng en geur met sout en varsgemaalde swartpeper. Sny vier groot vierkante uit 2x 400 g-velle blaardeeg. Smeer rande met 1 geklitste eier en skep vulsel aan die een kant van elke stuk deeg. Vou toe en druk stewig vas. Verf met res van geklitste eier en plaas op uitgevoerde bakplaat. Plaas in oond en bak 30 – 35 minute.
5 PREI-SAMPIOEN- EN-KAASPASTEI
GENOEG VIR 4 PASTEIE Verhit oond tot 180 °C. Sny 4 preie in skywe en spoel goed af. Verhit 60 ml olyfolie in pan en braai preie tot sag. Voeg 2 gekapte knoffelhuisies en 125 g gesnyde wit sampioene by en braai tot sampioene sag is. Geur met sout en varsgemaalde swartpeper en laat afkoel. Voeg 100 g gerasperde parmesaankaas by en meng goed. Sny vier groot sirkels uit 1 x 400 g-vel blaardeeg. Smeer die rande met 1 geklitste eier en skep vulsel op een kant van die sirkel. Vou toe en druk stewig vas. Plaas op uitgevoerde bakplaat en plaas in oond. Bak 30 – 35 minute tot goudbruin en bros.
6 RICOTTA-SPINASIE- EN-SPEKPASTEI
GENOEG VIR 4 PASTEIE Verhit oond tot 180 °C. Dompel 200 g baba-spinasieblare in bak met kookwater. Laat staan tot dit verwelk. Dreineer in vergiettes en druk oortollige water uit. Kap grof. Sny 4 repies strepiespek in blokkies. Verhit 30 ml olyfolie in pan en braai spek tot bros. Voeg 2 fyngekapte knoffelhuisies en spinasie by en braai nog 5 minute. Laat afkoel en voeg 200 g ricottakaas en 1 geklitste eier by en meng goed. Geur met sout en varsgemaalde swartpeper. Sny 8 vierkante uit 1 x 400 g-vel blaardeeg. Skep vulsel op 4 vierkante en smeer 1 geklitste eier om rande. Maak toe met ander 4 deegvierkante en druk rande stewig vas. Smeer res van geklitste eier bo-op en plaas op uitgevoerde bakplaat. Plaas in oond en bak 30 – 35 minute.
7 BILTONG-EN- KAASPASTEI
GENOEG VIR 1 GROOT PASTEI Verhit oond tot 180 °C. Meng 100 g gerasperde wit cheddarkaas en 150 g gesnyde beesbiltong in ’n mengbak. Sny 1 x 400 g-vel blaardeeg in twee groot vierkante. Skep vulsel op een vierkant en smeer rande met 1 geklitste eier. Plaas ander vierkant bo-op en smeer met geklitste eier. Versier bo-op met oortollige deeg en smeer met res van geklitste eier. Plaas in oond en bak 30 – 35 minute tot goudbruin en bros.
8 KAAS-EN- UIEPASTEI
GENOEG VIR 4 PASTEIE Verhit oond tot 180 °C. Verhit 60 ml olyfolie en 15 ml botter saam in ’n pan en voeg 2 uie (in skywe gesny) en 2 fyngekapte knoffelhuisies by. Braai tot sag en deurskynend en geur met sout en varsgemaalde swartpeper. Laat afkoel en voeg 100 g gerasperde wit cheddarkaas by. Sny vier lang stroke uit 1 x 400 g-vel blaardeeg. Verf rande met 1 geklitste eier. Skep vulsel bo-op. Sny kante in repe en vleg bo-oor. Verf met geklitste eier en plaas op uitgevoerde bakplaat. Plaas in oond en bak 30 – 35 minute tot goudbruin en bros.
9 BOTTERSKORSIE-EN-FETAKAASPASTEI
GENOEG VIR 6 PASTEIE Verhit oond tot 180 °C. Plaas 300 g botterskorsie (in blokkies gesny) op bakplaat. Sprinkel 60 ml olyfolie oor en geur met sout en varsgemaalde swartpeper en 3 klein takkies vars tiemie. Plaas in oond en bak tot sag. Haal uit en laat afkoel. Krummel 2 wiele fetakaas en meng met botterskorsie. Sny 1 x 400 g-vel blaardeeg in 6 lang stroke en skep vulsel aan een kant van elke strook. Verf rande met 1 geklitste eier en vou toe. Verf res van geklitste eier bo-op en plaas op uitgevoerde bakplaat. Plaas in oond en bak 30 – 35 minute tot goudbruin en bros.
10 FOREL-EN-PREIPASTEI
GENOEG VIR 6 PASTEIE Verhit oond tot 180 °C. Plaas 250 g forelfilet op ’n bakplaat en sprinkel so 40 ml olyfolie oor. Bak 10 minute. Haal uit oond en laat afkoel. Sny 4 baba-preie in skywe en spoel deeglik af. Verhit 30 ml botter in pan en voeg preie en 2 fyngekapte knoffelhuisies by. Braai tot preie sag is en geur met sout en varsgemaalde swartpeper. Laat afkoel. Vlok forel in stukke en voeg by preie. Voeg 125 g crème fraîche by en meng goed. Sny 2 x 400 g-velle blaardeeg in 12 vierkante. Skep vulsel op 6 vierkante en smeer rande met 1 geklitste eier. Maak vierkante toe met ander 6 deegvierkante en verf res van geklitste eier bo-op. Plaas op uitgevoerde bakplaat en plaas in oond. Bak 30 – 35 minute tot goudbruin en bros.