BEESSTERT- TERRIEN
Ek het my tradisionele beesstertbredie omskep in ’n koue terrien. Beesstert bevat baie natuurlike gelatien en dit stol maklik in die yskas.
GENOEG VIR 8 – 10
• SOWAT 60 ML OLYFOLIE • 1,3 KG BEESSTERT • SOUT EN VARSGEMAALDE SWARTPEPER • 1 GROOT WORTEL, IN KLEIN BLOKKIES GESNY • 1 UI, FYNGEKAP • 1 SELDERYSTINGEL, IN KLEIN BLOKKIES GESNY • 2 KNOFFELHUISIES • 1 X 400 G-BLIK GEKAPTE TAMATIES • 500 ML ROOIWYN • 1 LOURIERBLAAR • 2 VELLE GELATIEN OF 10 ML POEIERGELATIEN • SUURDEEGBROOD • VARS ROKETBLARE
Verhit oond tot 200 °C. Gooi olyfolie in oondkastrol. Plaas beesstertstukke in kastrol en geur met sout en peper. Plaas kastrol oop in oond. Oondbak tot vleisstukke bruin is. Draai vleisstukke om en oondbak tot ander kant ook bruin is. Verlaag oond se hitte tot 180 °C. Voeg wortel, ui, seldery en knoffel by. Maak kastrol toe met deksel en plaas terug in oond. Oondbak tot groente sag is. Haal kastrol uit oond en voeg tamaties, rooiwyn en lourierblaar by. Geur weer met sout en peper. Maak kastrol toe met deksel en plaas terug in oond. Oondbak sowat 3 uur tot vleis van been afval. As jou sous te min raak, kan jy kookwater byvoeg. Haal uit oond en laat effens afkoel. Verwyder vleis van bene en vlok in baie klein stukkies. Meng vleis goed deur sous. As jy die gelatienvelle gebruik, week dit sowat 2 minute in koue water tot sag. Druk vloeistof uit en voeg by warm vleis en meng goed deur. As jy die poeiergelatien gebruik, gooi dit in ’n klein bakkie. Voeg sowat 30 ml koue water by en laat staan tot dit soos spons lyk. Plaas bakkie met gelatien in ’n groter bak met kookwater en laat smelt. Voeg nou die gesmelte gelatien by warm vleis en meng goed deur. Voer ’n terrienbak van 1,4 liter uit met kleefplastiek. Skep vleismengsel in en maak bak toe met deksel. Plaas oornag in yskas tot gestol. Net voor jy dit voorsit, keer versigtig uit terrienbak en verwyder kleefplastiek. Sny in skywe en sit voor saam met suurdeegbrood en vars roket.