SMOORSNOEK
Smoorsnoek is so tradisioneel aan Suid-Afrika soos Tafelberg aan Kaapstad. Soos baie ander eg tradisionele Suid-Afrikaanse disse, is dit in die Bo-Kaap deur die Maleiers ontwikkel. Dis egter ’n dis wat geleidelik besig is om uit kombuise te verdwyn. Só hou ek van hom:
(VIR 6 PORSIES)
• 1 GROOT UI, FYNGEKAP • GOEIE GROENTE-OLIE • 2 KNOFFELHUISIES, FYNGEKAP • ROOI SOETRISSIE, FYNGESNY • 1 – 2 VARS BRANDRISSIES, FYNGEKAP (PITTE
UITGEHAAL) • 3 GROOT AARTAPPELS, GESKIL EN IN KLEIN
BLOKKIES GESNY • 300 G GEROOKTE SNOEK, OF GISTERAAND SE OORSKIET-BRAAISNOEK, GRATE UITGEHAAL EN GROFGEVLOK (TE FYN SNOEK KOOK NOG FYNER EN EK WIL HIER EN DAAR IN ’N STUKKIE SNOEK VASBYT) • 3 TAMATIES, FYNGESNY • HAND VOL VARS KOLJANDER OF PIETERSIELIE • SAP VAN SUURLEMOEN
Soteer ui in groente-olie in ’n pan. Braai dan vinnig die knoffel, soetrissie en brandrissie(s). Voeg aartappels by. Kook stadig tot net gaar. Roer nou en dan. Voeg snoek, tamaties, koljander of pietersielie by. Maak net warm. ’n Goeie skeut suurlemoensap rond dit af. Sit voor op rys, saam met ’n tuinslaai (of nog beter met avokado, asook mango en papaja). Of as ’n voorgereg of ligte versnapering op jou eie knoffelbrood. (Sien onder.)