EIERS!
In sy soektog na die storie agter die bestanddele in kos, maak kosredakteur Herman Lensing kennis met Angus McIntosh en sy ‘meisies’ – 4600 geveerde dames, wat daagliks van die beste eiers in Suid-Afrika lewer. Angus en sy henne sorg ook vir inspirasie
Goeiemôre, my meisies!” groet Angus elke oggend sy spierwit lê-henne. “Hoe gaan dit met jou, hartjie?” vra hy vir die een onder sy arm en streel haar saggies oor die kop. Só herbevestig hierdie hoenderboer op die Spier-wynlandgoed, naby Stellenbosch, doelbewus sy liefde en toewyding aan dié diere.
Dit vorm deel van die groter biodinamiese visie van die plaas as ekosisteem, sê Angus, wat onder meer behels dat kos van die hoogste gehalte geproduseer word met geen of baie min negatiewe impak op die omgewing. Hy glo gelukkige diere lewer smaaklike produkte, en hy is glad nie skaam om te sê sy henne se eiers is die beste in Suid-Afrika nie. Jy wil glo dis waar, veral as jy hoor top-restaurante soos Le Quartier Français op Franschhoek, Atlantic Suites in Kampsbaai en Grande Roche in die Paarl koop almal sy eiers.
Angus is die hoofboer op Spier, en afgesien van hoenders, boer hy ook met beeste en druiwe vir die plaas se wyn. Volgens Angus kry jy net twee soorte boere: Dié wat die omgewing afbreek en dié wat die omgewing opbou. As jy kyk na die uitgestrekte stuk onomheinde groen grasveld waaraan sy henne hulle verlustig