Barbara sê
Ek kies al jare kortpad in my kombuis. Toe my kinders klein was, het ek altyd vir hul verjaardae my gewese lektrise Ina Paarman se sjokoladekoek-in-’n-boks gebak. Dis een van die heel lekkerste koeke, maklik en vinnig om aanmekaar te slaan. Menige keer het ’ n ander ma dié resep gevra en dan het ek net gesê ek sal dit stuur. Een ma het so baie van die koek gehou, sy het elke jaar partytjie toe gekom net vir die eet.
Ek en ’n vriendin, Mapula van Biljon, het jare gelede spyseniering gedoen. Een aand het ons ’ n ete vir 30 mense gehad. Gesiene wynmakers en koskenners. Ons was moeg en Mapula verklaar toe sy gaan nie die sjokolademousse ook nog maak nie. Sy’t pakkies kits-sjokolademousse gekoop en dit opgedollie met baie room en brandewyn. Só flous ons toe al ons grênd gaste, en hulle was mal daaroor!
Die TV-program Come dine with me – die Britse weergawe – is lekker kykstof. Maar iets wat my pla, is dat die deelnemers altyd beweer hulle het alles self gemaak, selfs fillodeeg. Wie op aarde maak nog self fillodeeg? Jy koop dit!
Kollega Herman Lensing se gunsteling-kortpad is gekoopte sponskoek – daardie koeke wat jy by jou supermark se bakkery kry. Die geheim om die koek te laat smaak of dit in jou eie kombuis gebak is, is om dit te bedruip met ’ n suikerstroop of bietjie soetwyn. Dit raak lekker klam en niemand sal kan raai dis winkelkoek nie. En dan gee jy dit smaak en tekstuur met van sjokolademousse tussen die lae tot gesoute karamelsous bo-oor.
Tanya Fourie, SARIE.com-kosredakteur, gebruik graag ’ n gaar winkelhoender. Dit spaar moeite en elektrisiteit, en die bonus is daar’s geen ekstra skottelgoed nie. Dis haar staatmaker-bestanddeel wanneer sy nie weet wat om te kook nie, vertel Tanya, want jy kan dit maklik omskep in ’ n verskeidenheid geregte soos hoenderpastei, Thai-groenkerrie of ’ n voedsame slaai.
Die boodskap is duidelik: Kortpad in die kombuis maak jou lewe makliker – doen dit net!
Die volgende uitgawe van SARIE KOS is vanaf 30 Mei te koop.