DIE SOUT-EN-ASYN-DEBAT
Harmonie is die geheim van ’n geslaagde bondgenootskap tussen sout en suur.
Met sy sterk karakter kan asyn nogals soms oorneem, maar trek dan net die leisels in om die vrede te bewaar. Bewonderaars stry ook soms goedig oor dinge soos wat eerste oor kos gesprinkel moet word – sout eerste of andersom?
Nie almal het ewe veel erg aan die twee se samesyn nie. Kaas-en-uiegeur skyfies in die kenmerkende geel-en-groen pakkies is immers die wêreld se topverkoper. Die sout en-asyn-weergawe in die blou pakkie beklee darem ’n respektabele tweede plek.
Maar ons wat in die sout-en-asyn-kamp is, kry meer as net ’n pakkie tjips vir ons geld. Wat anders laat jou kiewe so saamtrek in genotvolle afwagting vir die smaak-en-kraaksensasie terwyl jy ritselend die blou pakkie ooptrek?
Errieda du Toit – die Huiskok