Piesangroomys ( banana split)
Wie onthou nie dié klassieke nagereg van die vorige eeu nie? Dis al in 1904 uitgedink in Amerika, met vele variasies wat op die oorspronklike resep gevolg het. My weergawe het karamel en ’n knippie sout in.
genoeg vir 6
200 g suiker 100 ml water 50 ml botter 125 ml room 5 ml sout 6 piesangs, geskil en in die lengte gehalveer 250 ml gekoopte grenadella-smeer ( curd) 1 liter vanieljeroomys
Gooi suiker in ’n pot en voeg water en botter by. Roer met ’n draadklitser oor lae hitte tot opgelos. Bring tot kookpunt en laat vinnig kook tot ’n goue karamel vorm, 8-10 minute. Moenie roer terwyl die sous kook nie. Voeg room by en meng vinnig met ’n draadklitser tot glad. Werk versigtig, want die karamelmengsel is baie warm. Laat afkoel en gooi sout by. Pak piesangskywe in opdienborde (twee skywe per porsie). Skep lepels vol grenadella-smeer tussenin. Skep balle roomys by. Gooi karamelsous oor. Sit voor. >