Roosterkoek-resep

Yolani se span staan vroeg in die oggend op om die roosterkoek te maak. Haar geheim vir eenvormigheid is ’n groot koekiedrukker waarmee sy die deeg uitsny. genoeg vir 12

2 500 g koekmeel plus ekstra vir sprinkel 15 g kitsgis 25 ml suiker 20 ml sout 30 ml kookolie 1 900 ml louwarm water

MAAK EERS JOU DEEG

Meng meel, gis, suiker en sout in groot mengbak. Voeg olie en louwarm water by. Meng goed tot kniebare deeg vorm. Knie 8-10 minute. Plaas deeg in skoon bak wat gesmeer is met olie. Maak toe en laat rys op warm plek tot dubbel die volume – sowat 1 uur. Kry solank jou kole reg.

1Krap kole uit vuur en plaas rooster oor kole – dit moenie te warm wees nie. Jy moet jou hand minstens 10 tellings sowat 10 cm bo die kole kan hou.

2Besprinkel werkvlak ruim met ekstra meel en keer deeg daarop uit. Druk deeg met vingerpunte plat tot sowat 1 cm dik. Sny groot deegsirkels van jou keuse uit met koekiedrukker, sodat al die koeke ewe groot is.

3Braai roosterkoek 5-8 minute aan een kant. Draai om en braai verder aan die ander kant.

4Draai roosterkoeke op die sy en braai só vir nog 1-2 minute. Roteer heeltyd om seker te maak dit word dwarsdeur gaar. Om te toets of dit gereed is, kan jy liggies op die roosterkoek klop. As dit hol klink, is dit gaar. Sit warm voor.