Appel-en-vark-kerriefrikkadelle
Beter pasmaats kry jy skaars. Sit die frikkadelle voor met ’n vars groenappelslaai vir ’n heerlike ligte ete. genoeg vir 4
Verhit oond tot 180 °C. Verhit oondvaste braaipan oor hoë hitte tot warm. Voeg 30 ml olyfolie, 1 gerasperde ui, 2 gekapte knoffelhuisies, 5 ml borrie en 5 ml fyn koljander by. Roerbraai 1 minuut of tot geurig. Voeg gebraaide geurmiddels by 700 g varkmaalvleis saam met 3 gerasperde appels. Meng saam. Voeg genoeg dubbeldik jogurt by tot lekker klam vleismengsel vorm wat jy in frikkadelle kan rol. Geur met sout en peper. Rol happiegrootte frikkadelle en pak in pan waarin ui gebraai is. Gooi 1 x 410 g-blik klappermelk oor. Oondbraai 20-25 minute of tot frikkadelle gaar is en romerige sous vorm. Meng 2 groen appels wat in skywe gesny is met 45 ml witwyn-asyn, 30 ml korrelmosterd en 60 ml olyfolie. Sit voor met gaar frikkadelle.